"Bu qələbə futbolu inkişafa aparacaq" - Mikayıl Quliyev

Biz Azərbaycan futbol tarixində ən böyük hadisələrdən birini yaşadıq. Sevinməyə bilərikmi? Biz belə böyük bir faktın canlı şahidi olduq.

Bunu AFFA-nın İnformasiya və İctimaiyyətlə Əlaqələr departamentinin rəisi və “Futbol dünyası” qəzetinin baş redaktoru Mikayıl Quliyev Teleqraf.com-a açıqlamasında deyib. O, bütün heyəti və komandanın azarkeşlərini təbrik edib:

“Düşünün, artıq biz Çempionlar Liqasının böyük oyunlarını canlı izləyə biləcəyik. Komandanın rəhbərliyini, oyunçularını, azarkeşlərini təbrik edirəm. Azarkeşlərə təşəkkür edirik, ona görə ki, sona qədər komandaya inandılar və öz dəstəklərini əsirgəmədilər. Oyunçulara isə təşəkkür edirik, ona görə ki, sona qədər yüksək peşəkarlıq və böyük əzmkarlıq nümayiş etdirdilər. “Qarabağ”ın adının Avropada səsləndirilməsi artıq böyük tarixi hadisədir. Bu qələbə Azərbaycan futbolunu inkişafa aparacaq. Bu futbolumuzun peşəkar aləmdə müstəviləşməsinə son dərəcə böyük təsir göstərəcək. Bundan böyük uğur ola bilməz!"