“Qarabağ” bəyanat yaydı - Məhkəməyə verəcəklər

“Qarabağ” klubu loqodan istifadə ilə bağlı bəyanat yayıb.

Teleqraf.com kluba istinadən xəbər verir ki, bəyanatda aşağıdakılar qeyd olunub:

““Qarabağ” FK-nın Azərbaycan futbol tarixində görünməmiş uğura imza ataraq Çempionlar Liqasının qrup mərhələsinə yüksəlməsi bütün ölkədə böyük sevincə səbəb olmuşdur. İnsanların kütləvi şəkildə öz sevinclərini müxtəlif şəkildə göstərməsini məmnuniyyətlə qarşılayır və buna səbəb olmağın qürurunu ifadə edirik.

Amma çox təəssüf edirik ki, bəzi şirkətlər xalqın ümumi sevgisindən öz ticari maraqları üçün istifadə edərək “Qarabağ”ın adından, loqotipindən yararlanırlar. Bildirmək istəyirik ki, “Qarabağ” FK loqo və brendindən istifadə etmək hüququ sadəcə klubun sponsoru “Azersun Holdinq”ə məxsusdur. Klub loqosu və brendindən icazəsiz olaraq reklam xarakterli paylaşımlar, bildirişlərə qarşı hüquqi prosedur başladılacaqdır”.