Məmmədyarov Feysbukda yazdı: “Üzr istəyirəm…”

Almaniyanın paytaxtı Berlində İddiaçılar Turnirində ikinci yeri tutan Azərbaycan şahmatçısı Şəhriyar Məmmədyarov azarkeşlərinə təşəkkür edib.

Teleqraf.com xəbər verir ki, qrossmeyster şəxsi Feysbuk hesabı vasitəsi ilə yarış müddətində ona dəstək olan insanlara minnətdarlığını bildirib.

O, turnirin birirncisi ola bilmədiyi üçün azarkeşlərdən üzr istəyib:

“Dostlar, sizdən şikayətim yoxdur, sadəcə, məni dinləyin. Zamanım az olsa da, sizləri izlədim. Azərbaycanlı olsam da, mənə yox, italyana, erməniyə olan dəstəyi də gördüm. Demək istədiyim budur – yaxşı ki, varsınız. Sizlərə birincilik yaşatmadığım üçün üzr istəyirəm.

Amma sonuncu olmaq hissiyyatını yaxın belə buraxmadım. Çox sağ olun, mənə sona qədər inandınız. Bütün mesajlarınızı aldım. Cavab almadınızsa, üzrlü sayın, sadəcə, inanın. Yaxşı ki, varsınız. Biz geri qayıdacağıq. Uğurlar və 100 dəfə çox sağ olun”.

Qeyd edək ki, İddiaçılar Turnirinin qalibi 9 xalla ABŞ şahmatçısı Fabiano Karuana olub. Məmmədyarov isə 8 xal toplamağı bacarıb.