"Bilirdik ki, çətin olacaq" - Ayxan Abbasov

"Əvvəlcə 2 məqama toxunmaq istərdim. Rahid Əmirquliyevə ailəsindəki itkiyə görə başsağlığı vermək istərdim. Eyni zamanda, "Sumqayıt" azarkeşlərini təbrik edirəm. Bilirdik ki, bizə çətin olacaq. Rəqib müdafiədə kompaktlığı ilə seçilən komandadır.

Bu gün futbolçulardan istəyim mütləq qalibiyyət idi. Bu 3 xal bizə lazım idi. Ardıcıl məğlubiyyətlərdən sonra komandaya inam gəlmək üçün bu qələbə bizə lazım idi. Bizə çətin olacağını bilirik. Maksimum əl-ələ verib bu vəziyyətdən çıxacağıq".

Bunu "Sumqayıt"ın baş məşqçisi Ayxan Abbasov evdə "Səbail"ə 1:0 hesabı ilə qalib gəldikləri Azərbaycan Premyer Liqasının XIII tur matçından sonra mətbuat konfransında deyib.

Gənc mütəxəssis oyunun gedişində taktiki dəyişikliklərə əl atmasının səbəbini də açıqlayıb: "Taktikanı rəqibə görə dəyişirik. Bu gün hücum xəttində çoxalmaq istəyirdik. Bir sıra futbolçulara öndə yer vermişdik. Müdafiəyə isə 5 oyunçu ilə çəkilirdik. Çoxdandır komanda 5-li müdafiə ilə oynayır. Amma gələcək oyunlarda dəyişiklik ola bilər".