6 İyul 2022 00:07
749
12 Punto 14 Punto 16 Punto 18 Punto

"Qarabağ” UEFA Çempionlar Liqasında mübarizəyə başlayıb.

Teleqraf.com-un məlumatına görə, "köhlən atlar" I təsnifat mərhələsinin ilk oyununda Polşa "Lex"inin qonağı olub. Poznan şəhərindəki eyniadlı stadionda oynanılan qarşılaşma meydan təmsilçisinin 1:0 hesablı qələbəsi ilə başa çatıb.

Görüşün startından etibarən topa nəzarəti ələ keçirən “köhlən atlar” rəqibi öz qapısına doğru sıxışdırmağa başlayıb. İlk təhlükəli epizodu da qonaqlar yaradıblar. Amma 18-ci dəqiqədə baxımlı hücumu məntiqi sonluqla başa çatdırmaq mümkün olmayıb. Riçard Almeydanın zərbəsi qapının üstündən keçib. Az sonra Abdullah Zubir bir rəqibini keçib "çərçivə"ni yoxlasa da, top Artur Rudkonun üstünə gedib. 23-cü dəqiqədə oyunda maraqlı hadisə baş verib. Top “Qarabağ”ın futbolçularında olarkən meydana quş daxil olub. Bunu görən qapıçı Şahruddin Məhəmmədəliyev topu oyuna daxil etməyib. Təhlükəsizlik xidmətinin əməkdaşları quşu meydandan çıxardıqdan sonra görüş davam etdirilib. 35-ci dəqiqədə Kadi Borgesin cərimə meydançasının kənarından zərbəsi təhlükəli alınsa da, top hədəfdən bir qədər yayınıb. 41-ci dəqiqədə isə hesab açılıb. Meydan sahiblərinin birinci hissədəki yeganə təhlükəli hücumu qolla nəticələnib. Mikael İshak sağ cinahdan iti ötürmə zamanı Maksim Medvedevin kobud səhvindən yararlanaraq, topu bir toxunuşla qapıdan keçirib. “Qarabağ” fasiləyə minimal hesablı məğlubiyyətlə yollanıb.

İkinci hissə də Azərbaycan çempionunun hücumları ilə başlayıb. 47-ci dəqiqədə İbrahima Vadjinin iti bucaq altından endirdiyi zərbəni Rudko zərərsizləşdirib. Poznan təmsilçisinin buna cavabı isə daha təhlükəli alınıb. Lakin İshak hava ilə ötürülən topa toxuna bilməyib. İsveçli hücumçu 60-cı dəqiqədə növbəti dəfə azarkeşləri həyəcanlandırıb. Bu dəfə isə ona Məhəmmədəliyev mane olub. 62-ci dəqiqədə Qurbanov 3 əvəzetməyə əl atıb. 50 yaşlı mütəxəssis Almeydanı yeni transfer Marko Yankoviçlə, Leandro Andradeni Filip Ozobiçlə, Vadjini isə Ramil Şeydayevlə əvəzləyib. 67-ci dəqiqədə əvvəlcə qapıçı, ardınca isə Yankoviç “Qarabağ”ı 2-ci qoldan xilas edib. 72-ci dəqiqədə Zubir hesabı bərabərləşdirə bilərdi. Lakin onun zərbəsini Rudko barmaqlarının ucu ilə dəf edib. Az sonra Şeydayev rəqib müdafiəçinin kobud səhvindən sonra fərqlənmək şansını boşa verib. Ayağı sürüşən hücumçu topa çata bilməyib. 82-ci dəqiqədə Ovusu Kvabena və Toral Bayramov meydana daxil olublar. Onlar müvafiq olaraq, Kadi Borges və Elvin Cəfərquliyevi əvəzləyiblər. Matçın sonlarında ilk hissədəki hadisə təkrarlanıb. Meydana daxil olan quşu bu dəfə rəqib qapıçı kənara çıxarıb. Son dəqiqələrdə Məhəmmədəliyev ayağından zədələnib. Lakin əvəzetmə limiti tükəndiyi üçün Azərbaycan millisinin qapıçısı oyunu axsayaraq bitirib.

Beləliklə, "Qarabağ" futbolçularının səylərinə baxmayaraq, hesabı bərabərləşdirmək mümkün olmayıb və Qurban Qurbanovun baş məşqçi olduğu komanda ilk görüşdə Polşa çempionuna uduzub.

Qeyd edək ki, komandalar arasında cavab matçı iyulun 12-də Bakıda olacaq. Bu cütün qalibi II təsnifat mərhələsində İsveçrə "Sürix"i ilə qarşılaşacaq. Uduzan komanda isə UEFA Konfrans Liqasının II təsnifat mərhələsində "Slovan" (Bratislava, Slovakiya) – "Dinamo" (Batumi, Gürcüstan) cütünün məğlubu ilə üz-üzə gələcək.

00:05

Polşada "Lex" və "Qarabağ" komandaları arasında UEFA Çempionlar Liqasının I təsnifat mərhələsinin ilk oyununda hesab açılıb.

Teleqraf.com-un məlumatına görə, 41-ci dəqiqədə Mikhael İshak meydan sahiblərini önə çıxarıb.

22:00

Polşada "Lex" və "Qarabağ" komandaları arasında UEFA Çempionlar Liqasının I təsnifat mərhələsinin ilk oyunu başlayıb.

Teleqraf.com xəbər verir ki, Poznandakı eyniadlı stadionda keçirilən qarşılaşma Bakı vaxtı ilə saat 22:00-da start götürüb.

Görüşü Görüşü ispaniyalı FIFA referisi Xose Luis Munuera idarə edir.

Qeyd edək ki, komandalar arasında cavab matçı iyulun 12-də Bakıda baş tutacaq.


Müəllif: Teleqraf.com