"Bakıya qalib gəlmək üçün gedirik" - "Qarabağ"a qol vurmuş oyunçu

"Viktoriya"nın (Çexiya) futbolçusu Yan Sikora Çempionlar Liqasının pley-offunda "Qarabağ"la ilk oyun öncəsi fikirlərini bildirib.

Teleqraf.com xəbər verir ki, o, Ağdam təmsilçisinin nəticələrinin öz sözünü dediyini bildirib: "Onlar çox keyfiyyətli, "Şerif"dən daha yaxşı təşkilatlanmış komandadırlar. Amma biz ora qalib gəlmək və vətənə mümkün olan ən yüksək nəticəni gətirmək məqsədi ilə gedirik".

Y.Sikora 2016-cı ilin oktyabrında Çexiya "Slovan"ında çıxış edən zaman Avropa Liqasının qrup mərhələsinin ilk turunda "Qarabağ"la səfər matçında (2:2) "Dalğa Arena"da 10.69-cu saniyədə fərqlənib. Bununla o, avrokuboklarda ən sürətli qolun müəllifi olub. Həmin anı xatırladan oyunçu bildirib:

“Ora getməyi səbirsizliklə gözləyirəm. Bakı ilə bağlı yaxşı xatirələrim var. Qarşılaşma heç-heçə bitsə də, orada unudulmaz bir şey etdim. Bu, hələ də rekordlar kitabındadır, ona görə də mənim üçün həmişə xüsusidir. Amma biz tamam başqa oyun, başqa stadionda oynayacağıq və arzumuzu həyata keçirmək və irəliləmək üçün əlimizdən gələni etməliyik".

Qeyd edək ki, “Qarabağ”la “Viktoriya” arasında ilk görüş avqustun 17-də Bakıda, Tofiq Bəhramov adına Respublika stadionunda keçiriləcək. Oyun saat 20:45-də başlayacaq. Cavab görüşü isə avqustun 23-ü Çexiyada oynanılacaq. /Qol.az