15 Yanvar 2015 09:36
624

“Neftçi” klubunun baş məşqçisi Arif Əsədov Türkiyənin Antalya şəhərində təlim-məşq toplanışı çərçivəsində Səudiyyə Ərəbistanın “Hacer” klubu ilə keçirilən yoxlama oyunundan (3:1) sonra Qol.Az saytının suallarını cavablandırıb.

- Qış fasiləsində “Neftçi” ilk yoxlama oyununa çıxdı. Komandanız necə təsir bağışladı?

- Hazırlıq prosesi çox yaxşı və intensiv şəkildə gedir. Hətta, bugünki oyuna çıxmamışdan öncə də məşqimiz olmuşdu. Ona görə də bu oyunda komanda fiziki cəhətdən yorğun görünürdü. Bizim üçün belə qarşılaşmalarda əsas nəticə deyil. Çalışırıq ki, bütün futbolçulara şans verək.

- Keçirdiyiniz yoxlama oyununa iki hücumçu ilə meydana çıxdınız. Amma əksər hallarda biz “Nefçin”ni tək forvatla meydanda görürdük...

- Əsas məqsədimiz komandada oynayan bütün hücumçuları sınaqdan keçirməkdir. Növbəti oyunlarda da çalışacağıq ki, onların hamsını yoxlayaq. Hələlik heç bir taktiki dəyişiklik yoxdur. Növbəti oyunlarda komandanın potensiyalını artırmaq üçün əlimizdən gələi edəcəyik. Bu təlim-məşq toplanışında müxtəlif taktikalardan istifadə edəcəyik ki, bütün mövqelərdə futbolçuların yerini yaxşı təyin edə bilək.

- Elnur Allahverdiyevin komandadan getməsinin əsas səbəbi nədir?

- Bruno Bertuççi getdikdən sonra komandanın sol cinah müdafiə xəttində boşluq var idi. Yerli futbolçu baxımından həmin mövqedə klubumuzda oyunçu az olduğu üçün Elnur Allahverdiyevi komandaya kömək etməsi üçün gətirmişdik. Bir çox oyunlarda bizə çox yararlı olsa da, sonradan intizamsızlığından xəbər verdi. “Xəzər Lənkaran”la oyunda qırmızı vərəqə alması isə bizim üçün artıq hər şeyi aydınlaşdırdı və komandadan göndərildi. O, artıq azad transfer hüququna malikdir və istədiyi kluba gedə bilər. Antalyaya gəlməmişdən öncə ona bildirdik ki, artıq özü üçün komanda axtara bilər.

- Bu gün (dünən-red.) yoxladığınız oyunçulardan etimadınızı doğruldanlar oldumu?

- Hal hazırda daha çox gəncləri yoxlayırıq ki, onların necə təsir bağışladığını bilək. Fəhmin, Rahil və Mirkamil bu gün daha çox ümidləri doğrultdu. Onları artıq növbəti oyunlarda da meydanda görə biləcəyik. Bu təlim-məşq toplanışında da əsas məqsədimiz komandaya yeni futbolçular qazanmaqdır.

- “Neftçi”nin çempionatdakı oyunlarında bu futbolçuları meydanda görə biləcəyikmi?

- Çalışacağıq ki, burda olduğumuz müddətdə bütün oyunçuları sınaqdan keçirək. Növbəti yoxlama oyunlarında onlara yenə də şans verəcəyik ki, artıq sonda əsas heyyəti müəyyənləşdirək. Ola bilər ki, onlardan da kimsə əsas heyətə düşsün.

- Mirhüseyin Seyidovdan narazılıq edirdiz oyunda.

- Bəzi epizodlarda tez-tez top itkisi ilə yadda qalırdı. Bununla bağlı ona narazılıq edirdim. Qalan oyunlarda da bu cür hadisələrlə qarşılaşa bilərik. Çünki komanda yorğundur. Buna görə də belə hallar normaldır yoldaşlıq oyunlarında. Əsas məqsədimiz komandamızı çempionatın növbəti oyunlarına yaxşı hazırlamaqdır.

- Komandaya baxış üçün yeni futbolçular dəvət edəcəksiz?

- Hal hazırda bu barədə heçnə deyə bilmərəm. Hələ təzə başlamışıq hazırlığa. Amma növbəti günlərdə hansısa mövqədə problemlər özünü göstərsə ola bilər ki, yeni oyunşular dəvət edək .

- Rauf Əliyevin oyunu necə sizi qane etdi?

- Bəli bu gün Rauf Əliyev bir hücumçu kimi özünü göstərə bildi. O, “Xəzər Lənkaran” da az qol vurmuşdu. Biz onunla söhbət etdik ki, ilk oyunlardan yaxşı oynayıb inam yaratmalıdır.

- Rəhman Hacıyevlə anlaşa bildinizmi?

- Rəhman Hacıyev artıq bizimlə müqavilə bağlayıb. Amma onun Türkiyədən deportasiya olunması təlim-məşq toplanışımıza qoşulmasına mane oldu. Biz də qərar verdik ki, öz klubunda məşqlərini davam etdirsin. Bakıya qayıdandan sonra “Neftçi”nin düşərgəsinə qoşulacaq.

- “Adanaspor”un menecerləri və baş məşqçisi də oyunu izləyirdi. Dediklərinə görə, “Neftçi”nin heyyətində bəyəndikləri futbolçular var. Xüsusiilə Samir Məsimovu çox bəyəniblər.

- Bizim qapımız hər kəsə açıqdı. Xüsusən də gənc futbolçulara yaxşı klublardan dəvət olarsa, onun yolunu kəsmərik heç vaxt. Bu məsələ ilə bağlı heçnə deyə bilmərəm. Çünki real heçnə yoxdur. Amma Samir Məsimov daha yaxşı komandalara layiqdir.


Müəllif: