"Gələn il daha güclü qayıdacağıq" - Messi

Amerikanın “İnter Mayami” klubunun argentinalı hücumçusu Lionel Messi “İnstagram” səhifəsində paylaşım edib.

Teleqraf.com xəbər verir ki, ulduz futbolçu komandasının MLS-in pley-off mərhələsindən ayrılmasından sonra azarkeşlərə belə müraciət edib.

“Bəzi məqsədlərə nail olsaq da, daha çox istəyirdik. Bizə qoşulan və dəstək olan bütün insanlara təşəkkür edirik. İndi gələn il daha güclü qayıtmağa hazırlaşaq”, - deyə yazıb.

Noyabrın 10-na keçən gecə “İnter Mayami” pley-off mərhələsinin 1/8 final mərhələsinin üçüncü oyununda “Atlanta Yunayted”ə uduzub. Görüş 3:2 hesabı ilə başa çatıb, Messi matçda qol vurub.

Üç oyunluq qarşıdurmada “İnter Mayami” ilk oyunda 2:1 hesabı ilə qalib gəlsə də, ikincidə uduzub – 1:2, bu da “Atlanta”ya turnirin 1/4 finalına yüksəlmək imkanı verib. Komanda Orlando Siti ilə qarşılaşacaq.