FCSB-nin baş məşqçisi: "Heyəti klubun sahibi də açıqlaya bilər"

“Azərbaycan klubunda əhəmiyyətli şəxs (Abdulbari Gözəl - red.) dünyasını dəyişib, başsağlığı verirəm".

Teleqraf.com xəbər verir ki, bu sözləri Rumıniyanın FCSB klubunun baş məşqçisi Elias Xaralambus "Qarabağ"la UEFA Avropa Liqasının Liqa mərhələsinin VII turun oyunu öncəsi Tofiq Bəhramov adına Respublika stadionunda keçirdiyi mətbuat konfransında deyib.

44 yaşlı mütəxəssis çox güclü komandaya qarşı mübarizə aparacaqlarını söyləyib: "Rəqibin nailiyyətləri çoxdur və Avropada öz sözünü demiş komandadır. Bizi çətin və maraqlı oyun gözləyir. "Qarabağ"ın baş məşqçisi Qurban Qurbanov uzun müddətdir bu postdadır. Çox peşəkar komanda formalaşdırıb".

O, komandasının durumunu da müsbət dəyərləndirib: "Əsas sabahki oyuna diqqətimizi yönəlmişik. Statistikalarda komandaların qapıya vurduğu zərbələrə baxsaq, çox yaxşı vəziyyətdəyik. İnanıram ki, komamdam tapşırıqları sabah düzgün yerinə yetirəcək. Bu oyun bizim üçün çox vacibdir. Amma ehtiyatı əldən verməməliyik. Bəzən cədvəldə hanslsa klubun xalının az olması bizi çaşdırmamalıdlr. Bundan sonraki oyunlarımız var, ona görə ciddi yanaşmalıyıq".

Xaralambusun sözlərinə görə, Olavio Juninyonun "Qarabağ"dan gedişi FCSB üçün üstünlük sayılmayacaq: "Bu, nə bizə, nə də “Qarabağ”a təsir edəcək. Alternativləri var. Bizim də kapitanımız iştirak etməyəcək. Biz də öz növbəmizdə alternativlər düşünmüşük".

Bakıya itkilərlə gəldiklərini xatırladan baş məşqçi start heyəti özünün yox, klubun sahibi Cici Bekalinin açıqlamasına isə belə münasibət bildirib: "İştirak ərizəsini hər kəs açıqlaya bilər. Klub prezidentimiz Cici Bekali də, mən də. Hər kəsin fərqli yanaşmalar ola bilər. Bu bizim sabahki oyunumuza heç bir təsir etməyəcək. Ümid edirəm ki, sabahki oyunda sarı vərəqələr olmaz. Açığı baxmamışam ki, kimlərin sarı vərəqə limiti var, vəziyyət necədir. FCSB böyük klubdur, burda işləməkdən məmnunam. Qismət olsa uzun müddət burada işləmək istəyərəm. Əsas komandanın bir çox üzvü zədəlidir. Heyətimiz genişdir, hər kəs oynamaq istəyir. Digər oyunçulara da şans verəcəyik. Çalışacağıq ki, bu oyunçuların yoxluğu hiss olunmasın".

Qeyd edək ki, yanvarın 23-də Tofiq Bəhramov adına Respublika stadionunda keçiriləcək "Qarabağ" - FCSB oyunu saat 21:45-də başlanacaq.