“Whatsapp”da söyüş yazdığı üçün cəzalandı

İtaliya futbolunda maraqlı hadisə yaşanıb.

Hadisənin “qəhrəman”ı İtaliya B seriyasında mübarizə aparan “Bolonya”nın hücumçusu Daniel Kaçiadır.

31 yaşlı oyunçunun gündəmə gəlməsinə səbəb onun İtaliya Futbol Federasiyası (İFF) tərəfindən maraqlı səbəblə cəzalanmasıdır. Kaçia hansısa oyunda etdiyi hərəkətə görə yox, “Whatsapp”da menecerinə söydüyünə görə İFF tərəfindən bir oyunluq cəza alıb. Belə ki, futbolçunun təhqir etdiyi adı açıqlanmayan menecer bu barədə futbol federasiyasına mürəciət edərək, hücumçunun cəzalandırılmasını tələb edib.

İtaliya mətbuatı bu hadisənin dünyada ilk belə hal olduğunu vurğulayıb.

“Bolonya”ya mövsümün əvvəlində transfer olunan futbolçu bu müddətdə keçirdiyi 34 oyunda 10 qol və 4 məhsuldar ötürməylə yadda qalıb./publika.az/