Avropa Oyunlarında yarışacaq italyan basketbolçuların adları açıqlandı

İtaliya Bakı-2015 Avropa Oyunlarında mübarizə aparacaq 3X3 basketbol yığması üçün B seriyası üzrə dörd basketbolçunun adını elan edib.

Trend Avropa Oyunlarının saytına istinadən məlumat verir ki, bunlar İtaliyanın ikinci diviziyasının 5x5 basketbol yığması üzrə dörd basketbolçusu Andrea İannilli, Klaudio Neqri, Damiano Verri və Cionata Zampollidir.

Boyu 2,07 metr olan A.İannilli mərkəzdə dayanır və 31 yaşı var. O, İtaliyada A seriyası üzrə komandada oynayıb, lakin hazırda "Eternedile Boloniya" komandasında fəaliyyətini davam etdirir.

Braziliya əsilli, boyu 1,98 metr olan K.Neqrinin 29 yaşı var və "Oleccio Magic Basket" komandasında oynayır.

Boyu 2,06 metr olan D.Verri "Meridien Mosummano" komandasında oynayır.

Boyu 1,89 metr olan C.Zampolli isə "Amici Pallacanestro Udine" komandasının müdafiəçisidir.

İtaliyaya 2014-cü il Avropa çempionatından Avropa Oyunlarına vəsiqə qazandırmış basketbolçulardan heç biri (Ciovanni Aqusti, Andrea Bassani, Luka Tedesçini və Andrea Neqri) Bakı-2015 komandasında yer almayıb.