“Türk axını” yolunu dəyişdi: Afina xətti ləğv oldu

Son illərin nəhəng enerji layihələrindən biri sayılan “Türk axını”nın marşrutunda dəyişiklik baş verib.

Teleqraf.com xarici mediaya istinadla xəbər verir ki, Türkiyə üzərindən Avropaya gedəcək xətt Yunanıstandan deyil, Bolqarıstandan keçəcək.

Rusiya ilə Türkiyənin birgə hazırladığı layihə çərçivəsində boru kəməri Bolqarıstandan Rumıniyaya, Macarıstana, daha sonra Avropanın ürəyi sayılan Avstriyaya çatacaq.

Bununla əlaqədar Bolqarıstan tərəfi hazırlıqlara başlayıb.

Məlumatlara görə, bu dəyişikliyə səbəb boru xəttinin Yunanıstandan dəniz vasitəsilə Avropaya çatdırılmasına çoxlu miqdarda maliyyənin tələb olunmasıdır. Quru xətti ilə layihənin icrası zamanı milyonlarla dollara qənaət olunacaq.