DGK sədri İranın Azərbaycandakı səfiri ilə görüşdü

Bu gün Dövlət Gömrük Komitəsinin (DGK) sədri Səfər Mehdiyev İranın Azərbaycandakı səfiri Cavad Cahangirzadə ilə görüşüb.

Teleqraf.com Komitəyə istinadən xəbər verir ki, görüşdə S.Mehdiyev iki qonşu ölkənin istər siyasi-iqtisadi, istərsə də mədəni sahələrdə əlaqələrindən məmnunluqla söhbət açıb, Azərbaycan-İran münasibətlərinin bütün sahələrdə uğurla inkişaf etdiyini bildirib.

O, Prezident İlham Əliyevin və həmkarı Həsən Ruhaninin rəhbərliyi altında iki ölkə arasında uğurlu əməkdaşlıq və səmimi qonşuluq, qarşılıqlı etimad və anlaşmaya söykənən Azərbaycan-İran əlaqələrinin gələcəkdə də inkişaf edəcəyinə əminliyini vurğulayıb.

Qarşılıqlı münasibətlərin uğurlu inkişafında gömrük xidmətlərinin də mühüm rolu olduğunu diqqətə çatdıran S.Mehdiyev istər gömrük xidməti rəhbərləri səviyyəsində, istərsə də sərhəd-gömrük buraxılış məntəqələrində mütəmadi xarakter alan ikitərəfli görüşlərin iki qonşu ölkənin gömrük sahəsi üzrə mövcud əməkdaşlığının davamlı inkişafına müsbət təsirindən danışıb.

Azərbaycan iqtisadiyyatının formalaşmasında mühüm rolu olan gömrük işinin daha səmərəli və şəffaf şəkildə qurulması istiqamətində həyata keçirilən tədbirlər barədə də məlumat verən sədr bu islahatların iş adamlarının çevik, səmərəli fəaliyyəti üçün mühüm imkanlar yaratdığını vurğulayıb.

S.Mehdiyev bu ilin mayından Azərbaycan-İran sərhədindəki Astara, Biləsuvar və Culfa gömrük-sərhəd buraxılış məntəqələrinin 24 saatlıq iş rejimində fəaliyyət göstərməsinin əhəmiyyətini vurğulayıb, iki ölkə arasında əlaqələrin daha da genişlənəcəyinə və dərinləşəcəyinə əminliyini ifadə edib.

C.Cahangirzadə isə ölkəsinin Azərbaycanla münasibətləri genişləndirməkdə daim maraqlı olduğunu deyib, bütün sahələrdə, o cümlədən gömrük xidməti sahəsində qarşılıqlı əməkdaşlıqdan razılığını ifadə edib. Səfir qarşılıqlı birgə fəaliyyətin bundan sonra da intensivləşdirilməsinin vacibliyini bildirib.