Gələn il sürətli iqtisadi artım ili olacaq – Ekspert

Gələn ilin dövlət büdcəsi növbəti ilin iqtisadiyyatında artım tempinə uyğunlaşdırılmış maliyyə sənədi kimi xarakterizə olunmalıdır. Növbəti ildə Azərbaycanda ümumi daxili məhsulda 3,6 faiz artımın proqnozlaşdırıldığını nəzərə alsaq, bunun əvvəlki illə müqayisədə xeyli çox olduğunu görərik.

Teleqraf.com xəbər verir ki, bunu İqtisadi və Sosial İnkişaf Mərkəzinin rəhbəri Vüqar Bayramov deyib.

V.Bayramov bildirib ki, 2018-ci ildən başlayaraq Azərbaycan iqtisadi artım mərhələsinə qədəm qoyub və 2019-cu il daha sürətli iqtisadi artım ili kimi tarixə düşəcək.

Onun sözlərinə görə, 2019-cu ilin dövlət büdcəsində diqqətçəkən əsas məqamlardan biri bütün sahələr üzrə artımın qeydə alınmasıdır:

“Bu o deməkdir ki, sənəddə həm sosial, həm təhsil, həm də digər istiqamətlərə ayrılan vəsaitin həcmində artımlar olacaq. Xüsusən də sosial evlərin inşası ilə bağlı ayrılan vəsaitin həcmində, eləcə də təhsil xərclərinin artımı və buna uyğun olaraq təqaüdlərin təxminən 10 faiz artımı proqnozlaşdırılır.

Praktiki olaraq 2019-cu ilin dövlət büdcəsində gəlir və xərclərin təhlili göstərir ki, növbəti ildə əmək haqları və pensiya məbləğlərində artım olacaq. Artıq bununla bağlı rəsmi açıqlamalar da yayılıb. Bütün bunlar sosial müdafiə baxımından çox vacibdir.

2019-cu il dövlət büdcəsi sosial prioritetliyini qoruyub saxlayır, nəticə etibarı ilə bu, fərqli istiqamətlər üzrə artımların həyata keçirilməsinə, o cümlədən investisiya qoyuluşlarının, özünəməşğulluq proqramlarının genişləndirilməsinə xidmət edəcək.

Həmçinin, bu proqramlar çərçivəsində bir çox vətəndaşımızın, xüsusilə də ünvanlı sosial yardım alan vətəndaşlarımızın sahibkara çevrilməsi prosesi davam etdiriləcək. Bu baxımdan sosial, eləcə də regionların inkişafına investisiya qoyuluşları istiqamətində artım müşahidə olunacaq ki, bu da nəticə etibarı ilə 2019-cu ilin dövlət büdcəsindən vətəndaşların daha çox faydalanması və növbəti ildə sosial xərclərin prioritet xərclər sırasında olmasından xəbər verir”.