“Şahdəniz” yatağından Avropaya qaz nəqlinə başlanılması... - Qaxariya

Xəzər dənizindəki “Şahdəniz” yatağından Avropaya kommersiya məqsədli qaz nəqlinin başlanılması enerji təhlükəsizliyi sahəsində atılmış böyük addımdır.

Teleqraf.com xəbər verir ki, bu sözləri Gürcüstanın Baş naziri Giorgi Qaxariya söyləyib.

Hökumət başçısı vurğulayıb ki, Cənub Qaz Dəhlizi layihəsinin əsas məqsədi, həmçinin ümumi Avropa bazarında rəqabətin gücləndirilməsidir. Bu layihə Azərbaycanın “Şahdəniz” yatağından Gürcüstan vasitəsilə Türkiyə və Avropa İttifaqına, Yunanıstan və Albaniyaya qaz çatdıracaq.

Layihənin Gürcüstan üçün əhəmiyyətini qeyd edən Qaxariya qeyd edib ki, əlavə qaz müqaviləsi 2026-cı ilədək qüvvədə olacaq və Gürcüstan sənədə əsasən hər il 500 milyon kubmetrədək qaz əldə edəcək.

O bildirib ki, Cənub Qaz Dəhlizinin inkişaf etdirilməsinin həm də mühüm siyasi əhəmiyyəti var. Əgər indiyədək Gürcüstan yalnız regional əhəmiyyətli qaz tranziti ölkəsi idisə, indi artıq beynəlxalq miqyaslı oyunçuya çevrilib. Bundan sonra ölkə ərazisi vasitəsilə nəql olunan qaz beynəlxalq bazarların, əsasən də Avropa İttifaqının energetika bazarlarının şaxələndirilməsində və tədarüklərin təhlükəsizliyinin gücləndirilməsində mühüm rol oynayacaq.