2 ilə toxunan 57 kiloluq xalça kəsildi

“Azərxalça”nın Qəbələ emalatxanasında bu gün son iki ilin ən böyük xalçası kəsilib.

Bu barədə Teleqraf.com-a “Azərxalça” ASC-dən məlumat verilib.

Bildirilir ki, 24 kvadratmetrlik (4x6) xalçanın ümumi çəkisi 57.2 kiloqramdır. “Pirəbədil” çeşnili Quba xalçasının toxunmasına toxucular – Nəsirova Aygün, Şəkərxanova Xatirə və Sarıyeva Ülviyyə 2018-ci ilin aprel ayında başlayıblar.

COVID-19 pandemiyası dövründə xüsusi karantin rejiminin tətbiq olunması ilə xalçanın toxunması dayandırılıb. 1 il müddətində xalçaya güvə düşməməsi üçün müntəzəm olaraq dərmanlama prosesi aparılıb. 2021-ci ilin aprel ayından istehsalatın bərpa olunması ilə əlaqədar xalçanın toxunuşu davam etdirilib və iyul ayında xalça kəsilərək dəzgahdan götürülüb.

Böyük ölçülü xalçaları toxucular adətən 1 il və ya 1 il 3 ay müddətində tamamlayır.

Xatırladaq ki, emalatxanaların hər birində xalçalara baxmaq və əldə etmək imkanı mövcuddur.