Ali Neft Məktəbi ABB şirkəti ilə Memorandum imzaladı

ABB şirkətinin nümayəndəsi və Böyük Britaniyanın Baş nazirinin elçisi BANM-də oldu

Bakı Ali Neft Məktəbi və ABB şirkəti arasında Əməkdaşlıq haqqında Memorandumun imzalanma mərasimi keçirilib. Dekabrın 3-də tədbiri açan BANM-in rektoru Elmar Qasımov Prezident cənab İlham Əliyev tərəfindən aparılan uğurlu neft strategiyasından bəhs edib. Azərbaycanın dünyada sənaye üsulu ilə ilk neft çıxaran ölkə olduğunu vurğulayan Elmar Qasımov neft-qaz və kimya sənayesinin ölkə iqtisadiyyatının inkişafında əsas rol oynadığını və bu sahədə mütəxəssislərin hazırlanmasının ARDNŞ-nin fəaliyyətinin inkişafında vacib istiqamət olduğunu qonaqların nəzərinə çatdırıb.

ARDNŞ –nin Azərbaycanda və xarici ölkələrdə həyata keçirdiyi beynəlxalq layihələrdən söz açan rektor BANM-in əsas məqsədinin Azərbaycanda beynəlxalq standartlara cavab verən müasir ingilis dilli yüksək ixtisaslı kadrların məhz öz ölkəmizdə yetişdirilməsi olduğunu bildirib.

Üçillik fəaliyyətinə baxmayaraq Azərbaycanın ali təhsil ocaqlarının reytinq cədvəlində ən yüksək yer tutan BANM-də olmasından məmnunluq bildirən ABB şirkətinin Azərbaycan üzrə nümayəndəliyinin rəhbəri Rüstəm Qasımov “ABB şirkətinin yerli infrastrukturun inkişafına təsiri” mövzusunda təqdimatla çıxış edib. Təqdimatda qeyd olunub ki, 1883-cü ildə təsis edilmiş və baş ofisi Sürix şəhərində yerləşən ABB şirkəti elektrotexnologiyalar və avtomatika sahəsində aparıcı şirkətlərdən biri olaraq dünyanın 100-dən artıq ölkəsində fəaliyyət göstərir. Şirkət 145.000 nəfərdən artıq işçiyə sahibdir. Çıxışında R.Qasımov şirkətin başlıca olaraq 5 əsas istiqamət üzrə məhsul (elektrik cihazları, elektrik sistemləri, mühərriklər və enerji ötürücüləri, minimal gərginlikli məhsullar, proseslərin avtomatlaşdırılması avadanlıqları) və xidmətlər təklif etdiyini qeyd edib.

Tədbirdə iştirak edən Böyük Britaniya parlamentinin üzvü və Baş nazirin Qazaxıstan, Azərbaycan və Türkmənistan regionunda Ticarət məsələləri üzrə elçisi Çarlz Hendri professor-muəllim heyəti və tələbələr qarşısında çıxış edib. O BANM-də olmasından məmnunluğunu dilə gətirib. Ç.Hendri Azərbaycan və Böyük Britaniya arasında təhsil sahəsində əlaqələrin inkişafından danışaraq iki ölkə arasında nəinki energetika və humanitar, o cümlədən təhsil sahəsində əlaqələrin genişlənməsində maraqlı olduğunu vurğulayıb. Sonra C.Hendri tələbələrin çoxsaylı suallarını cavablandırıb.

Tədbir çərçivəsində BANM-in rektoru E.Qasımov Ç.Hendrini Ali Məktəbin “Fəxri qonaq” diplomu ilə təltif edib.

Tədbirdə iştirak edən Heriot-Vatt Universitetinin Mühəndislik və Təbiət elmləri fakültəsinin dekanı Prof. Stefen Makloxlin BANM və Heriot-Vatt universiteti arasında əməkdaşlıqdan söz açdı və bu iki ali təhsil ocağı arasında əlaqələrin dinamik inkişafından danışdı. O, təmsil etdiyi ali məktəblə BANM arasında uğurlu ikitərəfli əməkdaşlığın mövcudluğunu bildirib.

Sonra Bakı Ali Neft Məktəbi ilə ABB şirkəti arasında Əməkdaşlıq haqqında Memorandum imzalanıb.

Tədbirdə həmçinin, Böyük Britaniyanın ölkəmizdəki fövqəladə və səlahiyyətli səfiri İrfan Siddiqi, İsveçrə Konfederasiyasının ölkəmizdəki səfiri Paskal Abişer, hər iki səfirliyin nümayəndələri və şirkət təmsilçiləri iştirak ediblər.

NİGAR