Rusiya Türkiyədən kömək istədi - 21,3 milyard dollar...

Rusiyanın ən böyük müstəqil təbii qaz şirkəti “Novatek”in 21,3 milyard dollar dəyərində olan “Arctic LNG 2” layihəsinə Türkiyədən yardım gələ bilər.

Teleqraf.com xəbər verir ki, yunan mətbuatı Rusiyanın şimal qütbündəki LNG proqramına görə Türkiyədən asılı vəziyyətə düşdüyünü yazıb.

Bildirilir ki, “Baker Hughes”, “Saipem” və “Technip” kimi nəhəng şirkətlər layihədən çəkildikdən sonra “Novatek” planlaşdırıldığı kimi proqramı tamamlaya bilməyib. “Novatek” dünyanın ən böyük üzən elektrik stansiyaları parkına malik Türkiyənin “Karpowership” şirkəti ilə görüşüb. “Novatek”in türk şirkəti ilə razılaşmaqdan başqa çarəsinin olmadığı da vurğulanıb.

“Novatek”in dayanma nöqtəsinə gələn “Arctic LNG 2” layihəsi də qərb texnologiyasından asılıdır. Sanksiyalar səbəbindən Sibir bölgəsində inşa ediləcək təbii qaz layihəsi təhlükə altındadır.

Güman edilir ki, güc gəmisi “Baker Hughes” tərəfindən çatdırılacaq turbinləri əvəz edə bilər. Amerika şirkəti “Arctic LNG 2” üzərində 20 ədəd “LM9000” turbin qurmalı idi. Turbinlərdən yalnız dördü gətirilib və “Baker Hughes” sanksiyalar tətbiq edilməzdən əvvəl Rusiyanı tərk edib.

Bildirilir ki, 2010-cu ildən bəri Türkiyənin “Karpowership” şirkəti bu gün enerji sistemləri az inkişaf etmiş ölkələri enerji ilə təmin edən 25 güc gəmisi inşa edib. Bu tip gəmilər hazırda 10 Afrika ölkəsində, həmçinin Yaxın Şərq və Latın Amerikasında fəaliyyət göstərir. Elektrik gəmiləri gəmilərə quraşdırılmış üzən elektrik stansiyalarıdır, ağır mazut, dizel yanacağı və ya təbii qazla işləyə bilər.

Bundan əlavə, mühüm hissələri istehsal edən Çin gəmiqayırma zavodları da “Novatek” ilə əməkdaşlığı dayandırmaq qərarına gəlib.

“Novatek”in nəhəng tikintilərinin nəticələri dramatik ola bilər. Əgər “Arctic LNG 2” layihəsi tamamilə dayanarsa, “Belokamenka” yatağı sonda xəyali bir şəhərə çevrilə bilər.