Nüfuzlu dörd beynəlxalq maliyyə təşkilatından - Xəbərdarlıq

Beynəlxalq Valyuta Fondunun (BVF), Dünya Bankının, İqtisadi Əməkdaşlıq və İnkişaf Təşkilatının (OECD) və Ümumdünya Ticarət Təşkilatının (ÜTT) prezidentləri qlobal iqtisadi mənzərənin pisləşməsi barədə xəbərdarlıq ediblər.

Teleqraf.com xəbər verir ki, BVF bu il qlobal artımın 3,2 faiz, gələn il isə 2,7 faizə düşəcəyini gözləyir.

BVF-nin idarəedici direktoru Kristalina Georgiyeva bildirib ki, iqtisadi göstəricilər qlobal artımın daha da zəiflədiyini göstərir. O, Çinin sərt COVID siyasətlərində çevikliyinin yerli iqtisadiyyat və dünyanın qalan hissəsi üçün yaxşı xəbər olduğunu deyib.

Dünya Bankının prezidenti Devid Malpass da qlobal mənzərə ilə bağlı bədbindir. O, dünya iqtisadiyyatının tənəzzülə düşəcəyindən dərin narahatlıq keçirdiyini və staqflyasiyadan (inflyasiya və işsizliyin eyni anda baş verməsi - red.) qaçmaq üçün daha çox iş görülməli olduğunu bildirib.

Ümumdünya Ticarət Təşkilatının baş direktoru Nqozi Okonjo İveala qeyd edib ki, qlobal ticarət problemlərlə üzləşir və ticarət artımı sürətini itirir. O bu il üçün proqnozlaşdırılan 3,5 faiz artımdan sonra qlobal mal ticarətinin gələn il cəmi 1 faiz artacağı ilə bağlı proqnozunu bölüşüb.

OECD baş katibi Mathias Cormann qlobal iqtisadi mənzərənin pisləşməyə davam edəcəyini proqnozlaşdırır. O, Çinin COVID qaydalarında yumşalmaya getməsini sevindirici hal hesab edir.