Azərbaycanda hotellərin gəlirləri açıqlandı

Bu ilin 6 ayında mehmanxana (hotel) və mehmanxana tipli obyektlərin gəlirləri 2022-ci ilin müvafiq dövrü ilə müqayisədə 42,4 faiz artaraq 209,3 milyon manat olub ki, onun da 60,1 faizi nömrələrin (otaqların) təqdim olunması üzrə xidmətlərdən, 27,4 faizi ictimai iaşə xidmətlərindən, 4,4 faizi müalicə və sağlamlıq xidmətlərindən, 8,1 faizi isə digər xidmətlərin göstərilməsindən əldə edilib.

Dövlət Statistika Komitəsindən Teleqraf.com-a bildirilib ki, 2023-cü ilin yanvar-iyun aylarında mehmanxana (hotel) və mehmanxana tipli obyektlərin birdəfəlik tutumundan istifadə 16,6 faiz səviyyəsində olub (2022-ci ilin yanvar-iyun aylarında 12,4 faiz). Bu göstərici Naftalanda 43,4 faiz, Şabranda 35,4 faiz, Bakıda 27,1 faiz, Beyləqanda 26,9 faiz, Qubada 23,2 faiz, Bərdədə 22,8 faiz, Qusarda 19,5 faiz, Sabirabadda 18,7 faiz, Şuşada 18,6 faiz, Lənkəranda 17,9 faiz, Ağcabədidə 17,4 faiz, digər şəhər və rayonlarda isə ölkə üzrə orta göstəricidən aşağı olub.