“Azəriqaz”la "Gəncə Cihazqayırma Zavodu" arasında yeni razılaşma - Xərclərin azaldılması üçün...

Məişət tipli qaz sayğaclarına yaranmış tələbatın ölkədaxili imkanlar çərçivəsində yerli istehsal hesabına tam təmin edilməsi nəzərdə tutulub.

Teleqraf.com xəbər verir ki, bu məqsədlə SOCAR "Azəriqaz" İstehsalat Birliyi və "Gəncə Cihazqayırma Zavodu" ASC arasında müqavilə imzalanıb.

Müqaviləyə uyğun olaraq Birliyin sayğaclara olan tələbatının yerli istehsalçı tərəfindən təmin edilməsi ilk növbədə idxaldan asılılığı azaldacaq. Bundan əlavə, yerli sahibkarlığın inkişafına dəstək veriləcək, yeni iş yerləri yaradılacaq, xarici valyutanın ölkədən kənara çıxmasının qarşısı alınacaq, həmçinin qaz sayğaclarının təmiri, servis xidməti ilə bağlı məsələlərin asanlaşdırılması və bu sahə üzrə xərclərin azaldılması təmin olunacaq.

“Gəncə Cihazqayırma Zavodu” ASC tərəfindən istehsal olunan və “Azəriqaz” İstehsalat Birliyinə təhvil verilən məişət tipli qaz sayğacları artıq qaz şəbəkəsində yoxlanılıb və sınaqdan uğurla keçib.