Türkiyə-Azərbaycan Universiteti ilə bağlı tender elan edildi

Türkiyə-Azərbaycan Universitetinin yerləşdiyi tədris binası üçün şəbəkə sisteminin satınalınması ilə bağlı tender elan edilib.

Teleqraf.com dövlət satınalmalarının vahid internet portalına istinadən xəbər verir ki, satınalan təşkilat Azərbaycan Texniki Universitetidir. Satınalma müqaviləsinin dəyəri 337.755,75 manatdır.

İddiaçılar təkliflərini dekabrın 28-nə qədər təqdim edə bilərlər. Zərflərin elə həmin gün açılması nəzərdə tutulub. Tenderdə iştirak haqqı 350 manatdır.

Azərbaycan ilə Türkiyə arasında ortaq universitet layihəsi 2023-cü ilin iyununda President İlham Əliyev ilə Türkiyə prezidenti Rəcəb Tayyib Ərdoğan arasındakı görüşdən sonra açıqlanıb. Türkiyə-Azərbaycan Universitetinin yaradılması barədə anlaşma memorandumu 2024-cü ilin 17 fevralında Azərbaycanın Elm və Təhsil Nazirliyi ilə Türkiyənin Ali Təhsil Şurası arasında imzalanıb. Universitet tamamilə yeni yaradılmış təhsil müəssisəsi yox, fərqli universitetlərin müxtəlif proqramlarını ehtiva edən yeni nəsil universitetdir. Universitetə ilk qəbul Bakı şəhərində üç təhsil proqramı üzrə həyata keçirilib.

Prezident İlham Əliyevin 2024-cü il sentyabrın 23-də imzaladığı sərəncam ilə Türkiyə-Azərbaycan Universitetinə Dövlət İmtahan Mərkəzinin keçirdiyi qəbul imtahanlarının nəticələri əsasında tələbə seçimini müstəqil aparmaq və ödənişli əsaslarla da tələbə qəbulu ala bilmə hüququ verilib.