21 Yanvar 2016 15:00
567
12 Punto 14 Punto 16 Punto 18 Punto

“Azərbaycana ərzaqlıq kartof və buğda idxal olunub”

Kənd Təsərrüfatı Nazirliyi yanında Dövlət Fitosanitar Nəzarəti Xidməti (DFNX) kütləvi informasiya vasitələrində ölkəyə emal məqsədilə idxal olunan texniki və yemlik sort kartofun istehlak bazarına çıxarıldığı və ərzaq kartofu kimi əhaliyə 20 dəfə bahasına satıldığı, eyni zamanda başqa ölkələrdə, əsasən heyvandarlıqda yem kimi istifadə olunan 4-cü və 5-ci sinif buğdanın Azərbaycana inhisarçılar tərəfindən ərzaq buğdası kimi idxal edildiyi və çörəkbişirmədə istifadə olunduğuna dair məlumatları təkzib edir.

DFNX-nin mətbuat xidmətindən verilən məlumatda bildirilir ki, yayılan məlumatlar əsassızdır. Azərbaycana bu vaxta qədər idxal olunan kartofun hamısı ərzaqlıq sortlar olduğunu bildirən DBNX-nin mətbuat xidməti belə əsaslandırır ki, 2015-ci ildə Azərbaycana 120799 ton kartof məhsulu idxal olunub ki, bunun da 19857 tonu ərzaq kartofu, 942 tonu isə toxumluq kartofdur: “Ölkəyə yalnız Azərbaycanın dövlət reyestrlərinə daxil edilmiş və istehsalatda istifadəsinə icazə verilmiş kartof sortları (Radomişlskiy, Ukrainskıy rozovıy, Nevski, Meçta, İdeal, Temp Laymdota, Filea, Solara, Nora, Aqriya, Lanra, Marabel, Mono Liza, Spinta, Arinda, İmpala və s.) gətirilir. Kənd Təsərrüfatı Nazirliyi yanında Dövlət Fitosanitar Nəzarəti Xidmətinə texniki və yemlik kartof sortlarının idxalı ilə əlaqədar heç bir müraciət daxil olmayıb. İstehlak bazarında texniki və yemlik kartofun ərzaq kartofu kimi təqdim olunması ilə bağlı yayılan məlumatların isə heç bir əsası yoxdur”.

Bildirilir ki, idxal olunan kartofda insan sağlamlığı üçün təhlükəli maddələrin - nitrat və nitridlərin, pestisidlərin, bəzi hallarda isə ağır metalların miqdarı yoxlanılır. Ölkəyə daxil olan hər yük partiyasından nümunələr analiz üçün Dövlət Xidmətinin Toksikologiya və Keyfiyyətə Nəzarət Mərkəzinə gətirilir və müvafiq laboratoriyalarda analizlər aparılır: “2015-ci ildə idxal olunan kartof məhsullarında nitrat və nitritlərin miqdarı yol verilən həddən aşağı olub, pestisidlər və ağır metallarla bağlı təhlükəli hallar qeydə alınmayıb.

Cari ildə müfəttişlər tərəfindən istehlak bazarında həyata keçirilən baxış zamanı 948 kq kartof məhsulunun göstəriciləri standartlarına uyğun gəlmədiyi üçün, məhv edilərək, dövriyyədən çıxarılıb”.

4-cü, 5-ci sinif buğdanın Azərbaycana inhisarçılar tərəfindən ərzaq buğdası kimi idxal edildiyi və çörəkbişirmədə istifadə olunduğuna dair məlumatlarla bağlı isə mətbuat xidmətindən qeyd olunur ki, Azərbaycana son zamanlar, ancaq 1-ci, 2-ci və 3-cü siniflərə aid olan yumşaq və bərk buğda gətirilir. 4-cü və 5-ci (qeyri-ərzaq məqsədilə) siniflərə aid buğdanın ölkəyə idxalı ilə bağlı Dövlət Xidmətinə müraciət olunmayıb: “İdxal olunan ərzaqlıq buğdanın hər yük partiyasının keyfiyyət göstəricilərinə Dövlət Xidmətinin Toksikologiya və Keyfiyyətə Nəzarət Mərkəzinin laboratoriyalarında analizlər aparmaqla, nəzarət edilir. Ötən il ərzində pestisidlərin qalıq miqdarının, ağır metalların və mikotoksinlərin müəyyən edilməsi üçün buğda məhsulu nümunələri üzərində aparılan analizlər zamanı keyfiyyətlə bağlı narahatlıq doğuran hallar qeydə alınmayıb.
Eyni zamanda, Dövlət Xidmətinin Respublika Karantin Ekspertiza Mərkəzinin müvafiq laboratoriyalarında idxal edilən buğda məhsulları karantin nöqteyi-nəzərindən ekspertiza edilib. Ekspertiza zamanı karantin tətbiq edilən və xüsusi təhlükəli zərərvericilər aşkar edildiyi üçün, 8945 ton buğda və 5938 ton arpa məhsulu beynəlxalq standartlara uyğun şəkildə fumiqasiya edilərək, zərərsizləşdirilib”.

Sonda o da bildirilib ki, idxal edilmiş buğda və un məhsullarından götürülmüş nümunələrin ekspertizası zamanı 2015-ci ildə 71 halda zərərli orqanizmlər aşkar edilib və müvafiq fitosanitar tədbirlər həyata keçirilib.

NİGAR


Müəllif: