Murad Ədalət Əliyevlə foto paylaşdı: “Payızda gəlirəm”

Düz 10 ildir Lider TV-də çalışıram. 10 il böyük rəqəmdir. Müasir dövr üçün 10 il xüsusilə miqyaslı görünür. Təsəvvür edin ki, mən “Lider”ə gələndə hələ ABŞ prezidenti ağdərili Corc Buş idi. Dünyada hələ Feysbuk, Yutub yox idi. İnstaqram ümumiyyətlə icad olunmamışdı. Mən “Lider”ə gələndə Di Kaprio hələ Oskar qazanmamışdı...

Teleqraf.com xəbər verir ki, bu sözləri bəstəkar-müğənni, “Lider” TV-nin tanınmış aparıcısı Murad Arif telekanalın prezidenti Ədalət Əliyevlə fotosunu paylaşaraq, sosial şəbəkədə yazıb.

Aparıcı yeni layihəyə hazırlaşdığını da xəbər verib: “10 il öncə Maykl Cekson, Uitni Hyuston sağ idi. 2007-ci ildə Murad Arif nəinki oxumurdu, heç mahnı da yazmırdı. Yəni belə uzun müddətdir ki, mən “Lider”dəyəm.

Bu 10 ildə mən "böyük adam" olmadım, amma çox böyüdüm. Güvənlə böyüdüm. O güvən “Lider”dir. Bu 10 il üçün səmimiyyətlə təşəkkür edib, yola davam edirik. Payızda, inşallah, “Lider”də yeni layihə ilə efirdəyik".

Qeyd edək ki, Murad Arifin Lider TV-də apardığı “Solo” verilişinin yayımı iyun ayında dayandırılmışdı.