Cazibədar mələyin ehtişamlı tərzi - FOTOLAR

Ən zövqlü “mələk”

Zəngin olmaq hələ zövqlü olmaq demək deyil. Eləcə də ideal bədənə sahib olmaq da dəb ilhasinə çevrilmək üçün kifayət deyil. Görəsən, dünyada elə bir qadın varmı ki, həm gözəl, həm zəngin, həm də zövqlü olsun. Sizi bilmirəm, amma mən o qadının Miranda Kerr olduğunu düşünürəm.

20 aprel 1983-cü ildə Sidneydə dünyaya göz açan avstraliyalı model Miranda Kerr 31 yaşında olmasına baxmayaraq, 20 yaşında görünür. Aktyor Orlando Blumdan bir oğlu olan Miranda dünyanın ən gözəl analarından biri hesab edilir. Model sadəcə bu xüsusiyyətlərinə görə deyil, həm də geyim tərzi, sadə və şıq görkəmi ilə diqqət çəkir. İnsanı ovsunlayan baxışları, səmimi gülüşü, qəmzəsi və seksuallığı ilə kişilərin ağlını başından alan gözəlçə, zövqü ilə də xanımları özünə heyran qoyur.

Modelliyə 1997-ci ildən başlayan Miranda “Maybelline” firmasının reklam siması olduqdan sonra məşhurlaşıb. Ancaq “Victoria's Secret” mələyi kimi fəaliyyəti karyerasının zirvəsi olub.

2007-ci ildən bu firma ilə işləyən model 2013-cü ildə müqaviləyə son verərək hamını təəccübləndirir. Qeyd edim ki, Miranda elə həmin vaxt Orlando Blumdan boşanır.

Model təbii kosmetik məhsullar satan “Kora Organics” şirkətinin yaradıcısıdır və hazırda bu işlə məşğul olur. O, “Treasure Yourself” - "Özünə yaxşı bax" adlı kitabın müəllifidir. Miranda kitabda gözəllik sirlərindən bəhs edib.

İndi isə keçək Mirandanın dillərə dastan olan geyim stilinə.

Öncəliklə onu qeyd edim ki, Mirandanın geyimə milyonlar xərclədiyini fikirləşirsinizsə, yanılırsınız. Hansı brend daim göz önündə olan və hər geyindiyi trendə çevrilən bir modelə sponsorluq etmək istəməz ki?! Bəli, Mirandanın geyimlərinin çoxunu brendlər alır. Moda dizaynerləri də xüsusi dəvətlər üçün ona bir-birindən gözəl qiyafələr hədiyyə edirlər.

Paltar: Emilio Pucci

Miranda qüsursuz bədənini nümayiş etdirməkdən çəkinmir. Cəsarət tələb edən dekolteləri çox sevir. Əlbəttə, kim belə gözəlliyə sahib olsaydı, eyni addımı atardı. Xatırladım ki, modelin bədəni 36, boyu 1.75 sm, bədən ölçüləri isə 81-61-86-dır.

13 yaşından bəri moda dünyasında olan Miranda bu illər ərzində dəb və doğru geyim qaydaları haqqında çox şey öyrənib. Onun ən çox kombinləri diqqət çəkir. Stilistlər belə modelin düzgün kombin seçimlərini yüksək qiymətləndirilər. Elə buna görə də gənc qızların onun stilini təqib etməsi təbii qarşılanmalıdır. Çünki hansı şalvarı, hansı ayaqqabı ilə, hansı donu hansı çanta ilə kombinləmək lazımdır? sualına ən yaxşı cavabı Miranda verə bilər.

Şıqlığı ilə hamını özünə heyran qoyur

Mirandanın stilini klassik adlandırmaq olar. Ancaq o klassik stilə öz cizgilərini əlavə edir. Ona görə də onun tərzinə elə “Miranda Kerr stili” desək, daha doğru olar.

Üzündəki uşaqlara məxsus məsumluq ifadəsi ilə təzadlıq təşkil etsə də, dəvətlərə dekolteli, yarıqlı seksual geyimlərdə gəlir. Maksi paltarlar geyindikdə isə dekolte və yarıqların olmamasına diqqət edir. Nə geyinməsindən asılı olmayaraq möhtəşəm görünməyi bacarır.

Dəvətlərdə Mirandadnı ən çox bədəninə yapışan geyimlərlə görürük. Qüsursuz fiqurası olduğu üçün bu tip paltarlar onda əla qalır.

Ayaqlarının gözəlliyini nümayiş etdirmək istəyəndə qısa donlar və şortlar geyinir.

Demək olar ki, bütün rənglərdə libaslar geyinir, ancaq ən çox qara rəngi sevir. Bu da təsadüfi deyil. Qara rəng onun yaşıl gözlərini ön plana çıxarır və onu daha da cazibədar göstərir.

Çiçək naxışlı geyimlər həm xüsusi gecələrdə, həm də gündəlik həyatda tez-tez müraciət etdiyi modellərdəndir.

Gipürlü paltarlar da onun vazkeçilməzləri arasında yer alır.

O, marketə gedəndə də şıqdır

Mirandanı digər məşhur gözəlçələrdən fərqləndirən onun gündəlik həyatda da çox şıq və baxımlı olmasıdır. Bir çox Hollivud ulduzu və məşhur modellər dəvətlərdə şıqlıq yarışına qatılsalar da, gündəlik həyatda rahatlığa üstünlük verirlər. Buna görə də onların makiyajsız, saçları dağınıq halda və pijama ilə çəkilmiş fotolarını görmək mümkündür. Miranda isə gündəlik həyatda da olduqca şıq geyinir. Düzdür o da çox makiyajın tərəftarı deyil və bəzən küçəyə makiyajsız çıxır. Ancaq makiyajsız halı podiumdakındən daha gözəldir, desək yanılmarıq.

Digər ulduzlardan fərqli olaraq gündəlik həyatda idman ayaqqabıları yox, stiletto model ayaqqabılar geyinir. Bəzən baletkalara müraciət edir. Ancaq seçimləri həmişə zövqlü olur.

Xüsusilə, yaz-yay aylarında çiçək naxışlı maksi donlara və ətəklərə üstünlük verir. Bu paltarları sadə və ya bəzəkli səndəllərlə tamamlayır.

Gündəlik həyatda vaz keçmədiyi geyimlərdən dar şalvarlar və qısa şortlar diqqət çəkir.Miranda Kerrin küçə stilində diqqət çəkən nüanslardan biri də qara dəri şalvarla qara və ya ağ rəngli ipək bluzları kombin etməsidir.

Dar şalvarları sevdiyini qeyd etdik, ancaq bol kəsimli şalvarları da geyinir. Bir sözlə Mirandanın bədəni hər stilə uyğun olduğu üçün geyinməkdən çəkindiyi paltar modeli yoxdur.

Miranda Nyu-York küçələrində dəbli görüntüsü və gözəlliyi ilə hamını özünə baxmağa məcbur edir. Yüksək bel şalvarları, şapkaları ilə stilistlərin də tərzini bəyəndiyi bir model olan Miranda Kerr digər stil ikonlarından seçilir.

Sadə və şıq olmağın ən yaxşı nümunəsi olan model hər halı ilə qadınlara gözəl geyinmək mövzusunda ilham verməyə davam edir.

Onun gündəlik geyimlərinə baxaraq bohem tərzinə daha çox meyilli olduğunu deyə bilərik.

Ancaq bu stilə ilişib qalmır, hər zaman öz əlavələrini edir.

Yayda qadınlar xüsusilə də onun şapka, günəş eynəyi, səndəl və çanta modellərini təqib edirlər və həmin modelləri almağa çalışırlar.

Ayaqqabı və çantaları trendə çevrilir

Cazibədar modelin ən diqqət çəkən aksessuarları isə ayaqqabı və çantalarıdır. Onun ayaqqabı seçməkdəki bacarığını qısqanmayan qadın yoxdur. Onun “İnstagram”da fotolarını paylaşdığı ayaqqabıların satışları çoxalır.

Gözəl ayaqlara sahib olmaq kifayət deyil, gərək onları düzgün təqdim etməyi də biləsən. Bunu Miranda Kerr ən gözəl şəkildə icra edir.

Möhtəşəm ayaqqabı kolleksiyasına sahib olan gözəlçənin qarderobunda neçə ayaqqabısının olduğu isə məlum deyil. Bəzi mənbələrdə onun 3000-dən çox ayaqqabısı olduğu deyilir. Ancaq çox vaxt sponsorlardan dəstək aldığı üçün, geyindiklərini geri qaytarmalı olur.

Modelin təkcə ayaqqabıları yox, eləcə də onları kombin etdiyi bir-birindən möhtəşəm çantaları diqqət mərkəzindədir. Böyük çantaları daha çox sevən Miranda yerinə görə kiçik çantalar da götürür. Əsas odur ki, hansı paltarla hansı çantanı götürməli olduğunu yaxşı bilir. Bu şıq görünməyin ilk şərtidir. Çünki dünyanın ən bahalı və ya ən şıq geyimini belə yanlış ayaqqabı, çanta seçimi ilə bərbad hala salmaq olar.

Aysberqin görünən tərəfi

Model “Elle” jurnalına evinin qapılarını açmış, hətta qarderobunu da nümayiş etdirmişdi. Yeri gəlmişkən, həmin fotoları təqdiim edirik:

Qeyd edim ki, model jurnala geyim otağının çox böyük olduğunu, bu fotolarda əks olunanların isə aysberqin sadəcə görünən üzü olduğunu söyləyib.

Şəkillərdə də göründüyü kimi Miranda ən çox “Celine”, “Chanel”, “Balenciaga” və “Tom Ford” brendlərini sevir.

Parlaq saçlar, cazibədarlığın ilk şərtidir

Miranda geyim tərzi qədər, saçlarının gözəlliyi ilə də diqqət çəkir. Düzdür, bir çox ulduzdan fərqli olaraq saçlarını fərqli formalara salmır, müxtəlif rənglərə boyatmaq da onluq deyil. Qəhvəyi və şabalıdı rəngin çalarları arasında səyahət edən model kölgələrlə görüntüsündə fərqlilik etməyə üstünlük verir.

Uzun saç kəsimindən vaz keçməyən Mirandanı düz, dalğalı, hörük və ya toppuz saç modellərində görmək mümkündür.

Makiyajda gözlər ön plandadır

Makiyajda sadəliyi sevən Mirandanın bu seçimi heç kimi təəccübləndirmir. Çünki onun makiyaja ehtiyacı yoxdur. Elə makiyajsız da gözəldir. Ancaq podiumda və qırmızı xalı gecələrində o da digər qadınlar kimi möhtəşəm görünmək üçün makiyaj edir. Gözlərinin rənginin ön plana çıxarmaq istəyən gözəlçə makiyajda bir-iki hiylə ilə buna nail olur. Bunun üçün doğru göz kölgəsindən istifadə etdikdən sonra göz qapaqlarının dibinə parlaq ağ rəngli göz kölgəsi çəkir.

Makiyajı tamamlamaq üçün bej rənglərdə olan dodaq boyalarından istifadə edir. Bəzən, xüsusilə də qara rəngli geyimlər seçdikdə daha uyğun olduğunu düşünərək qırmızı dodaq boyası çəkir. Bu makiyaj stili də Mirandaya çox yaraşır.

Hamilə Mirandanın qısqandıran gözəlliyi

Seksual modelin bir oğlunun olduğunu qeyd etmişdim. Heç vaxt şıqlığından vaz keçməyən Miranda elə hamiləlikdə də möhtəşəm görünməyi bacarıb. Hamiləlik fotoları da bunu sübut edir. Modelin demək olar ki, kökəlməsi diqqət çəkir.

“Mango”ya uğur gətirən reklam siması

2004-cü ildə Nyu-Yorka köçdükdən sonra “Next” model agentliyində qeydiyyatdan keçən Miranda bundan sonra dünyanın ən məşhur brendləri ilə işləyib, yüzlərlə dəfilədə iştirak edib.

“Baby Phat”, “Lisa Ho”, “Voodoo Dolls”, “Levi's”, “Bettina Liano”, “Nicola Finetti”, “L.A.M.B”, “Heatherette”, “Betsey Johnson”, “Trelise Cooper”, “Jets”, “John Richmond”, “Blumarine Swimwear”, “Seafolly Swimwear”, “Victoria's Secret”, “Anna Molinari”, “Roberto Cavalli”, “Enrico Coveri”, “Arden B”, “Cia Maritima”, “Amuleti J” və s. onun iş birliyi etdiyi brendlərdən bəziləridir.

Mirandanın zövqü brendlərin də diqqətini çəkib. Əvvəlcə gözəl gözləri və doğru makiyaj stili ilə xanımların stil ikonuna çevrilən Miranda 2006-cı ildə “Maybelline” firmasının siması olur.

2013-cü ildə “Mango”nun reklam siması seçilir. Keyt Mossdan sonra bu missiyanı həyata keçirən Miranda “Mango”ya uğur gətirir. Brend ötən illərdən daha çox gəlir əldə edir və modelin gələcəkdə bir daha bu brendin siması seçilməsi ehtimalı artır.

/tabloid.az/