28 Aprel 2015 12:10
1 542

Aktyor Elməddin Cəfərov müsahibə verib.

Teleqraf.com-un a24.az-a istinadən məlumatına görə, aktyor vaxtilə çalışdığı “Tək səbir” verilişinin aparıcısı Həsən Əliyevlə münasibətlərinin soyuması səbəblərindən danışıb:

“İdarəçilik zəif idi. Əsas səbəb bu idi. Hər şey pik nöqtədə olanda idarə edə bilmədi. Bunun səbəbi Həsənin qabiliyyətsizliyi deyildi. Çünki o, çox qabiliyyətli və idarəçiliyi yaxşı bacaran insan idi”.

Elməddin “Tək səbir” komandasının dağılmasının həmkarı Fərda Xudaverdiyevlə birlikdə solo fəaliyyətə başlamaq istəməsi ilə əlaqəli olduğunu bildirib:

“Bizi komandadan ayrılmağa Həsən vadar etdi. 3 il ərzində birlikdə işləməyi bacarmışdıqsa, nə oldu ki, yollarımızı ayırmalı olduq? 100 dollar maaş alırdıq, 105 dollar oldumu maaşımız? Əgər 230 dollara kirayədə qalırdımsa, 100 dollarla necə dolana bilərdim? Bütün bunları idarə etmək lazım idi. Konsert verdik, insan axını oldu. Konsertdən sonra böyük problemlər çıxdı. Heydər Əliyev Sarayında 2000 nəfərlik konsertdən 75 dollar pul aldıq. Yolumu getməyim neynəyim ki? Övladım olanda, doğum evinə verməyə 200 dollar tapa bilmədim… Məcbur idim toya gedim, film və reklam çəkilişlərini dəyərləndirim. Həsən özünə idman avtomobili, ev və villa aldı. Ancaq biz də kirayəmizi ödəyə biləydik də… Bütün bunlar deyilmir…”.

E.Cəfərov yeni yaradılan “Tək səbir”də təkrar Həsənlə birlikdə çalışmağın mümkünsüz olduğunu dilə gətirib:

“İnanmıram ki, 10 ildən sonra yenidən birlikdə çalışa bilək. Çünki ən azından, fikir və maraqlarımız üst-üstə düşməyəcək. Bugünkü xərclərlə yenidən 100 dollara qayıtmaq istəmirəm. “Papa canı, bundan sonra yaxşı olacaq” kimi vədlərə inanmıram daha. Real olaraq maraqlarımın təmin olunduğu yerdə müqaviləylə çalışıram”.


Müəllif: