Keçmiş “Nida”çı müğənni dostundan prokurorluğa şikayət etdi

“Nida” Gənclər Hərəkətının keçmiş üzvü Elsevər Mürsəlli müğənni Mətanət Əsədovanı yaxın dostu Zaur Xəlilovla bağlı prokurorluğa müraciət edib.

Bu barədə Teleqraf.com-a məlumat verən Elsevər Mürsəlli bildirib ki, Ölke.Az saytının müxbiri İntiqam Valehoğlu və müğənni Mətanət Əsədovanın yaxın dostu Zaur Xəlilovla bağlı Baş Prokurorluğa müraciət ünvanlayıb.

Elsevər Mürsəlli qeyd edib ki, Zaur Xəlilov və İntiqam Valehoğlunun barəsində mənə böhtan atdıqları və şantaj etdikləri üçün cinayət işinin açılmasını xahiş etmişəm: “Cinayət işi açılmasi ilə bağlı şikayət ərizəsi vermişəm. Haqqımda yazılanlara görə, Mətbuat Şurasına da müraciət edəcəyəm”.

Qeyd edək ki, “Nida” Gənclər Hərəkətının keçmiş üzvü Elsevər Mürsəllinin müğənni Mətanət Əsədovanı təhqir etməsi ilə bağlı Nəsimi Rayon Məhkəməsində bir ildir aparılan araşdırma yekunlaşıb. Hakim Babək Pənahovun sədrliyi ilə keçirilən prosesdə qərar elan edilib. Elsevər Mürsəllinin yaşayış yeri Xaçmaz rayonu olub və buna görə də iddia ərizəsini Xaçmaz Rayon Məhkəməsinə göndərilməsi barədə qərar qəbul edilib.

Xatırladaq ki, ötən ilin iyunun 30-da “Space” televiziyasında yayımlanan “Günaydın” verilişində yazar Əziz Musaoğlu ilə müğənni Mətanət Əsədova arasında qalmaqal baş verib. Verilişdə qonaqlar bir-birinin ünvanına söyüşlər səsləndiriblər.

Mətanət Əsədova yazıçı tərəfindən təhqir olunduğunu iddia edib. O, yazıçını məhkəməyə verib və 100 min manat təzminat ödəməsini tələb edib. Bundan sonra Elsevər Mürsəlli sosial şəbəkədə Mətanət Əsədovanın ünvanına xoşagəlməz ifadələr işlədib. Bu ifadələr isə bəzi saytlar tərəfindən yayılıb.

Bundan sonra Nəsimi Rayon Məhkəməsinə iddia ərizəsi ilə müraciət edən Mətanət Əsədova Elsevər Mürsəllinin barəsində Cinayət Məcəlləsinin 148-ci (təhqir) maddəsi ilə cinayət işinin başlanması və onun həbs edilməsini istəyib.

Bundan əlavə, Mətanət Əsədova Cəbrayıl Rayon Məhkəməsinə müraciət edərək yazar Əziz Musaoğlundan 100 min manat təzminat ödəməsini tələb edib.

Rəqsanə