Ədalət Şükürov gənc aktyorları tənqid etdi

Əməkdar artist Ədalət Şükürov Alternativ TV-də "Şou məkan" verilişinə açıqlamalar verib.

Müğənni özünü aktyor kimi sınamaq istədiyini deyib: “Kinoya çəkilmək üçün çox təklif gəlir. Ciddi bir film, mənə uyğun obraz olsa, canla-başla çəkilərəm. Əgər işin özü maraqlıdırsa, sən özünü o rolda görürsənsə, qonorar o qədər də önəmli deyil. Kriminal filmdə çəkilmək istəyərdim".

Ə.Şükürov Azərbaycan filmləri və teleseriallarını bəyənmədiyini vurğulayıb: “Bizdə yaxşı seriallar yoxdur. Dövlət tərəfindən telekanallara pul ayrıldı, amma yaxşı nəticələr vermədi. Özlərini göstərə bilmədilər. Azərbaycanda hələ də yaxşı filmlər çəkilmir".

Müğənni bəzi gənc aktyorları sərt tənqid edib: “Təəssüflər olsun ki, bizdə İncəsənət Universitetini bitirən özünü aktyor, sənətçi sayır. Elə deyil, gərək təcrübən olsun. Universiteti bitirən kimi gedib filmlərdə çəkilmək və “mən aktyoram” demək düzgün deyil. Elə olur ki, sən özünü o rolda görmürsən, amma pula görə məcbur olub çəkilirsən. Bu da yanlışdır”.//axşam.az