Mağazalardan Leqo oğurlayan gürcü ata və oğlu saxlanıldı

Polşada mağazalardan Leqo dəstləri oğurlayan Gürcüstan vətəndaşları saxlanılıb.

Teleqraf.com xəbər verir ki, bu barədə "Polsat News" məlumat yayıb.

Bildirilir ki, keçən həftə Sopotdakı Leqo mağaza rəflərindən beş dəst yoxa çıxıb. Mağazanın əməkdaşları kamera görüntülərini yoxlayandan sonra polisə müraciət ediblər.

Hüquq-mühafizə orqanlarının əməkdaşları müəyyən edib ki, ilk üç oğurluğu yaşlı kişi edib, sonradan isə onu gənc oğlan əvəzləyib.

Ümumilikdə, bir neçə gün ərzində onlar ümumi dəyəri təxminən 4 min zloti (təxminən 1750 manat) olan 11 qutu dizayner oyuncaqlarını oğurlayıblar.

Oğurlanmış dəstlər daha sonra Qdanskdakı lombardlarda tapılıb.

Şübhəli şəxslər polis tərəfindən saxlanılıb. Onların Gürcüstandan gələn 41 yaşlı kişi və onun 21 yaşlı oğlu olduğu məlum olub. Onları 5 ilə qədər həbs gözləyir.