"Google" 15 milyon istifadəçinin parolunu itirdi

İyul ayında "Google Chrome"da böyük nasazlıq yaranıb və nəticədə milyonlarla "Windows" istifadəçisi parolla brauzerə daxil ola bilməyib.

Teleqraf.com bu barədə xarici KİV-lərə istinadən xəbər verir.

Məlumata görə, problemə görə istifadəçilər köhnə parollarını tapa və ya yenilərini yadda saxlaya bilməyiblər. Problemin "Windows"da "Chrome 127" istifadəçilərinin təxminən 2%-nə təsir etdiyi qiymətləndirilir. Bu da təxminən 15 milyon istifadəçi təşkil edir. Ancaq "Chrome"un 3 milyarddan çox insanın istifadə etdiyini nəzərə alsaq, bu rəqəm daha da çox ola bilər.

"Google"un təklif etdiyi müvəqqəti həll yolu brauzerin "enable-features=SkipUndecryptablePasswords" bayrağından istifadə edərək komanda xətti vasitəsilə işə salınmasını tələb edirdi ki, bu da əksər istifadəçilər üçün əlverişsiz idi. Bununla belə, şirkət insidentə tez reaksiya verib və artıq iyulun 25-də yalnız brauzerin yenidən işə salınmasını tələb edən xəta üçün düzəliş təqdim edib.