Həmkarlar Konfederasiyasının qəzeti bağlandı

Azərbaycan Həmkarlar İttifaqları Konfederasiyasının (AHİK) rəsmi mətbuat orqanı "Ülfət" qəzeti nəşrini dayandırıb.

Teleqraf.com-un əldə etdiyi məlumata görə, mətbu orqan noyabrın əvvəlində bağlanıb.

Həftəlik nəşr olunan qəzet 8-9 min tirajla çap edilirdi. Mətbuat orqanında 20-yə yaxın əməkdaş çalışıb.

Qəzet nəşrini dayandırdığına görə, baş redaktor Aqil Dadaşov da işdən çıxıb.

Hazırda "Ülfət"in elektron versiyası fəaliyyət göstərir.

Qeyd edək ki, adıçəkilən mətbu orqanın ilk sayı 1991-ci ilin may ayında çap olunub.

Xatırladaq ki, Azərbaycan Həmkarlar İttifaqları Konfederasiyasına 1993-2024-cü il aralığında Milli Məclisin deputatı Səttar Möhbalıyev rəhbərlik edib. Bu ilin avqustunda isə AHİK-in növbədənkənar VII qurultayında Sahib Məmmədov konfederasiyanın sədri seçilib.