Məşhur aviaşirkətin təyyarələrində böcək aşkarlandı

"Turkish Airlines"ın sərnişinləri aviaşirkətin təyyarələrinin göyərtəsində yataq böcəklərinin olduğunu bildirirlər.

Teleqraf.com xəbər verir ki, bu barədə “The New York Times” yazıb.

Məlumata görə, həşəratlar 2024-cü ilin martında Yohannesburqdan İstanbula uçan təyyarədə tapılıb. Daha sonra oktyabr ayında İstanbuldan San-Fransiskoya reyslərdən də böcəklərin olması ilə bağlı məlumat yayılıb.

Nəşr qeyd edir ki, Türk Hava Yolları sərnişinlərə müxtəlif kompensasiya variantları təklif edib. “The New York Times”ın məlumatına görə, 400-ə yaxın təyyarə ilə 300-dən çox istiqamətə uçuşlar həyata keçirən aviaşirkət məsələ ilə bağlı açıqlama verməyib.

Qəzetə danışan ekspertlər bildirib ki, bir təyyarənin yataq böcəklərindən təmizlənməsi 2-5 gün çəkir və itirilmiş gəlir, eləcə də təmizlik xərcləri nəzərə alınmaqla 75-125 min dollara başa gələ bilər.