ABŞ-dan Azərbaycana qarşı yeni həmlə - “Bu, gərginlik yarada bilər”

“Rusiya və Fransa imtina etsə də, ABŞ Minsk qrupundan əl çəkmək istəmir”.

Teleqraf.com xəbər verir ki, bunu politoloq Elxan Şahinoğlu deyib.

Ekspert ABŞ hökumətinin Cənubi Qafqazla bağlı son qərarına diqqət çəkib:

“Rəsmi Bakı İkinci Qarabağ Müharibəsindən sonra haqlı olaraq, Minsk qrupunun “xidmət”lərindən imtina edib. Ukraynada apardığı işğalçı müharibə fonunda üzləşdiyi sanksiyalar səbəbindən Kreml də ABŞ-la birgə həmsədrlik institutundan vaz keçib. Hətta ermənilərə simptasiya olan Paris mövcud şərtlər altında Minsk qrupunun əhəmiyyətsiz olduğunu anlayıb. Bircə üçüncü "həmsədr" - Vaşinqton tutduğunu buraxmır.

ABŞ dövlət katibi Entoni Blinken Filip Rikeri Qafqaz danışıqları üzrə baş məsləhətçi və Minsk qrupunun həmsədri təyin edib. Rikerin səlahiyyətinin birinci hisssəsi normaldır, Azərbaycanla Ermənistan arasında istənilən vasitəçiliyin əleyhinə deyilik, ancaq “Minsk qrupunun həmsədri” ifadəsi işləri korlayır. Yoxdur da bu qrup, bu, təkcə bizim istəyimizlə bağlı deyil, Rusiya ABŞ-la bir masada oturmaq istəmir.

Bu yaxınlarda görüşdüyüm amerikalı diplomata “Vaşinqton niyə Minsk qrupundan imtina etmir” sualını verdim. Ona izah etməyə çalışdım ki, bu israrçılıq həm Azərbaycan-ABŞ münasibətlərinə lazımsız gərginlik yarada bilər, həm də Rusiyanın bölgədə möhkəmlənməsinə şərait yaradar ki, bu, Vaşinqtonun maraqlarına uyğun olmamalıdır. Amerikalı diplomatın cavabı belə oldu ki, Kreml “Minsk qrupuna yox” dediyinə görə Vaşinqton bunun tərsini - “Minsk qrupu davam etməlidir” demək məcburiyyətində qalıb.

Yenə də izah etməyə çalışdım ki, Azərbaycan ABŞ-ın Cənubi Qafqazda fəallığının əleyhinə deyil, bunun üçün Minsk qrupu xaricində kifayət qədər alət var, bunlardan istifadə etmək lazımdır”.