QDİƏT-dən İrəvana zərbə - Kiyev

Milli Məclisin deputatı, Mətbuat Şurasının sədri Əflatun Amaşov Qara Dəniz İqtisadi Əməkdaşlıq Təşkilatı (QDİƏT) Parlament Məclisi Baş Assambleyasının Ukraynanın paytaxtı Kiyev şəhərində keçirilən 50-ci sessiyasında çıxış edib.

Teleqraf.com-un məlumatına görə, Ə.Amaşov bildirib ki, QDİƏT-ə üzv ölkələrdə milli innovasiya sisteminin inkişafı son dərəcə vacibdir və bu istiqamətdəki fəaliyyət qurum daxilində perspektiv əməkdaşlıq üçün böyük bazadır. Deputat çıxışında əsasən ölkəmizdə ASAN Xidmət modeli ilə bağlı söhbət açaraq vurğulayıb ki, Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin uğurla fəaliyyəti dövlət qurumlarının işinin əlaqələndirilməsi, təkmilləşdirilməsi, səmərəliliyinin artırılması baxımından müstəsna əhəmiyyətə malikdir. Burada eyni zamanda vətəndaşlara xidmətin təmərküzləşməsi məsələsi də önəmlidir.

Ə.Amaşov çıxışında, həmçinin, 2016-cı ildə sözügedən dövlət agentliyinin tabeliyində yaradılmış “ABAD” publik hüquqi şəxsin fəaliyyətinə də toxunub.

Qeyd edək ki, QDİƏT Parlament Məclisi Baş Assambleyasının 50-ci sessiyasında Ə.Amaşovla yanaşı Milli Məclisinin deputatları Eldar Quliyev, Musa Quliyev, Jalə Əliyeva və Çingiz Qənizadə də iştirak edib.

QDİƏT-in Parlament Məclisi Baş Assambleyasının 50-ci sessiyasında təşkilatın tarixində ilk dəfə olaraq bəyannamə qəbul olunub ki, həmin sənəddə quruma üzv ölkələrin ərazi bütövlüyünün bərpa edilməsi, işğal altında olan torpaqların ərazi bütövlüyü çərçivəsində azad edilməsinə dair bənd də öz əksini tapıb. Bu, Ermənistanın sessiyada iştirak edən nümayəndələrinin etirazına səbəb olub.