Tehranda türk naşir saxlanıldı – Foto

Tehranda türk kitablarını çap edən “Əndişey-i Nov” nəşriyyatının müdiri Yusif Fərzanə saxlanılıb.

Teleqraf.com Güney Azərbaycana bağlı saytlara istinadən xəbər verir ki, bu barədə tanınmış azərbaycanlı fəal İnsafəli Hidayət məlumat verib.

O qeyd edib ki, Y.Fərzanə hazırda Evin zindanındadır:

“Ona bildirilib ki, kitabların müsadirə edilməsi, dindirilməsi, verilən suallar və ittihamlarla bağlı kütləvi informasiya vasitələrinə məlumat verilməməlidir. Evin zindanının müstəntiqləri nəşriyyatın müdirinə tapşırıb ki, türk dilində olan 800-dən çox kitab, əlyazmalar, sənəd və kompüter sərt disklərinin götürülməsi və müsadirə edilməsi haqda heç yerdə danışmasın. Əks halda ona qarşı tədbir görüləcək”.

Qeyd edək ki, “Əndişey-i Nov” nəşriyyatı Tehranda keçirilən əksər kitab sərgilərinə qatılır. Nəşriyyat XXXI Tehran Beynəlxalq Kitab Sərgisində də aktiv iştirak edib. Bu il Tehranda keçirilən kitab sərgisində bir qrup paniranist türk dilində kitab sərgiləyən pavilyonlara hücum edib, hücuma məruz qalan pavilyonlar arasında “Əndişey-i Nov” nəşriyyatının da adı çəkilir.

Məlumata görə, hücumçular arasında dövlət rəsmiləri də olub, onlar bütün qanunları ayaqlar altına alaraq irqçi mövqe sərgiləyib, türk dili və ədəbiyyatına olan nifrətlərini bir daha nümayiş etdiriblər.

Paniranistlər təhlükəsizlik qüvvələrinin müdaxiləsi ilə hücuma son versələr də, dövlət məmurları “Əndişey-i Nov” və digər türk nəşriyyatlarının çox sayda kitabını götürüb və həmin nəşriyyatların müdirlərinin yaşadıqları ünvanları qeyd ediblər.

Qeyd edək ki, “Əndişey-i Nov” nəşriyyatına İslami İrşad və Mədəniyyət Nazirliyindən lisenziya verilib, o qanuni şəkildə fəaliyyət göstərir. Nəşriyyatın müdiri Y.Fərzanə isə 40 ildir ki, bu işlə məşğuldur.