“Bu, böyük nailiyyətdir” - İlham Əliyev

“Region Agropark”ın yaradılması yeni iş yerlərinin açılmasına, ölkədə kənd təsərrüfatının inkişafına və ərzaq təhlükəsizliyinin təmin olunmasına töhfə verəcək”.

Teleqraf.com xəbər verir ki, bunu Prezident İlham Əliyev iyunun 5-də Goranboy rayonunda “Region Agropark”ın açılışında aqroparkın kollektivi ilə görüşündə deyib.

Dövlət başçısı qeyd edib ki, burada yaradılan şərait və gələcəkdə istehsal olunacaq məhsullar idxaldan asılılığı azaltmağa, ixracı isə artırmağa kömək edəcək.

Prezident İlham Əliyev son illərdə Goranboyda sosial layihələrin uğurla icra olunduğunu, ölkədə yeni yolların çəkildiyini diqqətə çatdırıb: “Davos İqtisadi Forumunun reytinqinə görə, Azərbaycan MDB məkanında ən yaxşı yolları olan ölkə seçilib, bu isə böyük nailiyyətdir”.

***

“Ölkədə səhiyyə sisteminin inkişafına diqqət göstərilir, yeni tibb müəssisələri tikilir, orada müasir avadanlıqlar quraşdırılır”.

Teleqraf.com xəbər verir ki, bunu Prezident İlham Əliyev iyunun 5-də Naftalan Şəhər Mərkəzi Xəstəxanasının açılışından sonra xəstəxananın tibb heyəti ilə görüşündə deyib.

Bu il ölkədə daha 5 xəstəxananın inşasının yekunlaşacağını deyən dövlət başçısı Naftalanın sosial-iqtisadi inkişafı ilə bağlı kompleks tədbirlərin görüldüyünü, abadlıq və tikinti quraşdırma işlərinin genişləndiyini diqqətə çatdırıb.

Naftalanın əvvəlki şöhrətinin özünə qaytarıldığını deyən ölkə rəhbəri burada müasir sanatoriyaların və mehmanxanaların fəaliyyət göstərdiyini, gələcəkdə bu istiqamətdə tədbirlərin davam etdiriləcəyini, ölkədə turizmin bütün sahələrinin, həmçinin tibbi turizmin inkişafı üçün böyük imkanların olduğunu bildirib.