“Bu, Azərbaycan diplomatiyasının uğuru idi” – Hikmət Babaoğlu

Dünyada təhlükəsizliyi təhdid edən risklərin artdığı bir vaxtda Azərbaycanda sabitlik və inkişaf mövcuddur. Prezident İlham Əliyevin bildirdiyi kimi bu sabitliyin əsasında Azərbaycan hakimiyyətinin həyata keçirdiyi siyasət və onun xalq tərəfindən dəstəklənməsi durur.

Bu sözləri Teleqraf.com-a açıqlamasında Milli Məclisin deputatı Hikmət Babaoğlu oktyabrın 9-da Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclas barədə danışarkən deyib.

Onun sözlərinə görə, bu, öz-özlüyündə həm Azərbaycanın inkişafını, həm də təhlükəsizliyini təmin mühüm edən sosial-siyasi faktordur: “Prezident İlham Əliyev iclasda qeyd etdi ki, dünyada təhlükəsizliyi təhdid edən risklər artmaqdadır və köhnə risk ocaqları ləğv edilməmiş yeni belə risk ocaqlarının yaranması kontekstində münasibətləri sabit saxlamaq və ölkənin inkişafına nail olmaq olduqca çətindir. Doğrudan da hazırkı beynəlxalq münasibətlər sistemində ayrıca götürülmüş bir dövlətin milli aktor kimi özünün təhlükəsizliyini təmin etməsi heç də asan deyil. Çünki “Security Community” adlandırılan yəni mühafizə olunan cəmiyyətlərdən kənardakı bu cəmiyyətlər əsas etibarilə, Qərb və Şimali Atlantika strateji rayonlarını əhatə edir. Bunlardan kənarda milli aktorların öz təhlükəsizliyini təmin etməsi çox çətin məsələdir. Lakin buna baxmayaraq, Azərbaycan öz təhlükəsizliyini təmin edib və inkişafımızın da əsasında duran başlıca faktor budur. Ancaq milli təhlükəsizliyin təmin olunması o qədər də sadə məsələ deyil. Beynəlxalq münasibətlərdə çoxsaylı iştirakçılar var və onların hər birinin öz maraqları var”.

Deputatın fikrincə, belə olan halda, mütləq toqquşan maraqların uzlaşdırılması və əməkdaşlıq platformasında qarşılıqlı maraqların təmin olunması razılaşmalarına gətirib çıxarmaq lazımdır: “Bu konteksdə cənab prezident Azərbaycanın qonşu ölkələrlə əlaqələrinə toxunaraq bildirdi ki, 2018-ci ildə Azərbaycanın qonşu ölkələrlə əlaqələri yeni pilləyə qədəm qoyub. Düşünürəm ki, bu aspektdə önə çıxan məsələlərdən biri də Xəzərin hüquqi statusuna dair Konvensiyanın imzalanmasıdır. Bildiyiniz kimi, Azərbaycan 5 Xəzəryanı ölkə ilə qonşudur və dünyada təhlükəsizliyi təhdid edən bu qədər risk ocaqları olduğu zamanda bir də qonşu ölkələrlə anlaşımazlığın olması əlbəttə ki, ciddi narahatedici məsələlərdən biri idi. Uzun illərdir davam edən danışıqların bəhrə verməsi Xəzər ətrafında yeni şərtlər formalaşdırmaqla həm onu sülh dənizinə çevirdi, həm də Xəzərin resurslarından istifadə olunması üçün yeni perspektivlər yaratdı. Eyni zamanda Xəzərdə yeni neft-qaz komunikasiyalarının yaranması üçün də şərtlər formalaşdırdı”.

Hikmət Babaoğlu qeyd edib ki, başqa vacib məsələ beynəlxalq təşkilatlarla münasibətlər və onların hazırkı səviyyəsidir: “Ölkə başçısı söylədi ki, Azərbaycan ilə Avropa İttifaqı arasında tərəfdaşlığın prioriteləri haqqında memorandum imzalanıb. Burada isə başlıca məsələ Azərbaycanın ərazi bütövlüyünün tanınması məsələsidir ki, bu da bizim xarici siyasətimizin əsas prioritelərindən biridir. Dünyanın ən böyük hərbi-siyasi təşkilatlarından biri olan NATO-nun 2018-ci il zirvə toplantısında Azərbaycanın ərazi bütövlüyünü dəstəkləyən bəyanatın qəbul edilməsi Azərbaycanın beynəlxalq münasibətlər sistemində yeri və nüfüzundan xəbər verir. Əlbəttə ki, xarici siyasətin qarşısında duran əsas məsələ Azərbaycanın işğal olunmuş ərazilərinin azad olunmasından ibarətdir. Bu istiqamətdə atılan strateji addımlar sayəsində Azərbaycan ordusunun gücü daim artır, ölkəmizdə hərbi paradlar və hərbi-sənaye məhsullarının sərgisi keçirilir. Əslində əsas məqsəd işğalçı ölkəyə gücümüzün nümayiş etdirilməsidir. Çünki güc nümayişi olmasa, sülhə məcburetmə də mümkün olmur. Azərbaycanın hərbi qüdrətinin artması, beynəlxalq təşkilatlarla münasibətlərin daha da genişlənməsi hər şeydən öncə Azərbaycan xalqının sosial rifahı və iqtisadi inkişafının təmin olunmasından keçir. İclada səsləndirilən rəqəmlər bir daha onu göstərdi ki, ötən 9 ay ərzində valyuta ehtiyatlarımız daha 3 milyard artaraq 45 milyarda çatıb. Bu, ciddi göstəricidir”.

Millət vəkili vurğulayıb ki, buna paralel olaraq Azərbaycanda yeni sosial problemlərin həll olunması, qaçqın və köçkünlərin mənzil-məişət şəraitinin yaxşılaşdırılması ilə bağlı tədbirlər keçirilir: “Cənab prezident görüləcək işlərlə bağlı önümüzdəki mərhələdə iqtisadi islahatların daha da dərinləşəcəyini bildirdi və həyata keçirilən bu layihələrin növbəti illərdə Azərbaycanın inkişafı üçün yaxşı perspektivlər yaratdığını qeyd etdi”.