Azərbaycan İƏT çərçivəsində əməkdaşlığa böyük önəm verir - Nazir

Xarici İşlər naziri Elmar Məmmədyarov İƏT Xarici İşlər Nazirləri Şurasının 46-cı sessiyası çərçivəsində "Üzv dövlətlər arasında inkişafın təşviq edilməsində İƏT-in rolu" adlı konsepsiya sənədinin müzakirəsi ilə bağlı keçirilən iclasda iştirak edib.

XİN-dən Teleqraf.com-a verilən məlumata əsasən, Azərbaycanın konsepsiya sənədinə tam dəstək verdiyini bildirən nazir Elmar Məmmədyarov İƏT çərçivəsində iqtisadi əməkdaşlığa səmərəli və hərtərəfli yanaşmanın zəruriliyini vurğulayıb. Həmçinin nazir Elmar Məmmədyarov İƏT-in fəaliyyətinin spesifik prioritetlərə əsaslanaraq aydın hədəflərə malik olmasını və təşkilatın potensialına, eləcə də insan və maliyyə resurslarına uyğun olmasını bildirib.

Daha sonra nazir Elmar Məmmədyarov Azərbaycanın İƏT çərçivəsində əməkdaşlığa böyük önəm verdiyini və təşkilatın səmərəliliyinin gücləndirilməsində maraqlı olduğunu xüsusilə qeyd edib

Azərbaycanın təşəbbüsü və iştirakı ilə həyata keçirilən regional və regionlararası ticarətin genişlənməsini hədəfləmiş geniş miqyaslı nəqliyyat, enerji və İKT layihələri haqqında məlumat verən nazir Elmar Məmmədyarov İƏT-ə üzv dövlətləri Azərbaycanın təşəbbüs və layihələrindən yararlanmağa dəvət edib. Nazir bu layihələrin rifah gətirəcəyindən, ölkələr arasında dostluğu və əməkdaşlığı gücləndirəcəyindən əminliyini ifadə edib.