“Azərbaycana qarşı informasiya müharibəsini…”- Hikmət Hacıyev

İtaliya kütləvi informasiya vasitələrinə müsahibə verən Prezident Administrasiyasının Xarici siyasət məsələləri şöbəsinin müdiri Hikmət Hacıyev mayın 29-da UEFA Avropa Liqasının Bakıda keçiriləcək final oyununa “Arsenal” komandasının futbolçusu Henri Mxitaryanın gəlməyəcəyi məsələsi ətrafında yaranmış vəziyyətə münasibət bildirib.

Teleqraf.com xəbər verir ki, H.Hacıyev deyib:

“Gəlməməklə bağlı qərar onun və klubunun qərarıdır. Biz Azərbaycan olaraq bəyan etmişik ki, Mxitaryan da daxil olmaqla Bakıda oynamağa gələn bütün futbolçuların təhlükəsizliyinə zəmanət verəcəyik. Təəssüf ki, futbolun siyasiləşdirilməsi tendensiyasını və ya cəhdlərini görürük ki, bu da qəbuledilməzdir. Futbol, ümumiyyətlə idman siyasətdən uzaqdır və siyasiləşdirilməməlidir. Bu xüsusda biz Azərbaycana qarşı informasiya müharibəsini görürük. Hər iki kluba – “Arsenal” və “Çelsi”yə uğurlar arzu edirik. Bütün Avropa qitəsində futbolun əsl dəyərlərinin təşviq edilməsinin və şəxsi məqsədlər üçün futbolu siyasiləşdirən elementlərin qarşısının alınması üçün birlikdə çalışmağın tərəfdarıyıq”.

Azərbaycan və Ermənistan arasında münaqişənin mövcud olduğunu, lakin nə futbolun, nə də H.Mxitaryanın hansı millətdən olmasının bununla əlaqəsinin olmadığını və onun futbolçu kimi Azərbaycana gələ biləcəyini deyən H.Hacıyev sözlərinə bunları əlavə edib:

“Ermənistan Azərbaycana qarşı müharibəni davam etdirir və Azərbaycan torpaqlarının 20 faizini işğal altında saxlayır. Bir milyon azərbaycanlı etnik təmizləməyə məruz qalıb. ABŞ, Fransa və Rusiya vasitəçi qismində münaqişənin sülh yolu ilə həlli üçün çalışırlar. Azərbaycan bu səyləri dəstəkləyir. Beynəlxalq ictimaiyyətlə birlikdə tezliklə münaqişənin həlli yollarına nail olmağa və Ermənistan silahlı qüvvələrinin Azərbaycan ərazilərinin işğalına son qoymasına çalışırıq”.

Müsahibə “İl Sole 24 Ore”, “Libero Quotidiano”, “İl Tempo”, “Affari İtaliani”, “İl Fogliettone”, “Quotidiano”, “Corriere di Siena”, “Corriere di Rieti”, “Corriere di Arezzo”, “Corriere di Viterbo”, “Corriere dell’Umbira”, “Unione Sarda”, “Virgilio”, “Yahoo Notizie” kimi mətbuat orqanlarında dərc edilib.