“İrəvanda baş verənlərə niyə susurlar?” – BAXCP sədrinin müavini

“Çiçəklənən Ermənistan” partiyasının sədri, parlamentdəki “Sarukyan” fraksiyasının rəhbəri Qagik Sarukyanın deputat toxunulmazlığı parlament tərəfindən ləğv edilib. Sarukyan ifadəsi alınmaq üçün təhlükəsizlik xidmətinə çağırılıb. Onun həbs ediləcəyi istisna olunmur. Sarukyanın məhz Paşinyan hakimiyyətini tənqid etməsindən sonra təzyiqlərə məruz qalması baş verənlərin siyasi təqib olduğunu sübut edir. Sarukyanla bağlı son hadisələr fonunda “azadlıq carçısı” olan bəzi beynəlxalq təşkilatların, beynəlxalq QHT-lərin, ümumən bir sıra Qərb təşkilatlarının səssizliyi heyrət doğurur”.

Bu açıqlamanı Teleqraf.com-a BAXCP sədrininin müavini, politoloq Niyaməddin Orduxanlı verib.

Onun sözlərinə görə, Ermənistanda baş vermiş hadisələrə beynəlxalq təşkilatların qeyri-adekvat münasibəti ikili standartlardan irəli gəlir:

“Biz hər zaman bu vəziyyətin şahidi oluruq. Azərbaycanda dövlət maraqlarını satan, xəyanətkarlıq edən, xarici kəşfiyyata işləyən şəxslərlə bağlı hüquq-mühafizə orqanlarımız tədbirlər həyata keçirir. Belə vəziyyətdə həmin təşkilatlar dayanmadan bəyanatlar verməyə başlayırlar. Bəzi hallarda proses haqqında məlumatları olmadan dövlətimizə qarşı ittihamlar irəli sürürlər. Ancaq indi Ermənistanda baş vermiş hadisəni “görmürlər” və yaxud özlərini görməməzliyə qoyurlar.

Paşinyan iqtidarı Ermənistanda dinc aksiya keçirən vətəndaşlara divan tutur. İndi gördülər ki, Paşinyan Sərkisyan rejimindən də amansızdır. Öz hakmiyyətini qorumaq üçün istənilən addımı atmağa hazırdır. İnsan haqlarının kobud pozulmasına heç bir əhəmiyyət verilmir. Sarukyanın tərəfdarları Ermənistan parlamentinin önündə etiraz aksiyası keçirməyə cəhd göstərsə də, ölkənin təhlükəsizlik qüvvələri tərəfindən onun qarşısı kobudluqla alınır və yüzlərlə adam saxlanılır. Hətta polis aksiyanı işıqlandıran jurnalistlərə qarşı güc tətbiq edir. Halbuki, hadisələr zamanı insanların ifadə azadlığı, azad toplaşma hüququ, hüquq-mühafizə orqanları tərəfindən lüzumsuz yerə güc tətbiq olunmaması, KİV-in sərbəst fəaliyyətinə imkan yaradılması və s. kimi Qərbin “önəm verdiyi” bütün dəyərlər ayaq altına salınır. Belə vəziyyətdə Qərb niyə susur? ABŞ Dövlət Departamenti, ATƏT-in Media Azadlığı üzrə nümayəndəsi, ABŞ-ın Ermənistandakı səfiri, Qərb ölkələrinin Ermənistandakı səfirlikləri özlərini elə aparırlar ki, sanki heç nə baş verməyib”.

Niyaməddin Orduxanlı hesab edir ki, küçə adamından baş nazir pilləsinə kimi irəliləmiş Nikol Paşinyanın amerikalı iş adamı Corc Sorosun təsis etdiyi Soros Açıq Cəmiyyəti (Soros Fondu) tərəfindən dəstəkləndiyi gün kimi hər kəsə aydındır:

“Paşinyanın 2018-ci ildəki küçə yürüşləri, mitinqləri və kütləvi aksiyalarının arxasında əslində hansı qüvvələrin dayandığı hər kəsə bəllidir. Ermənistanda anti-sorosçuların həbsi dediklərimizin bariz nümunəsidir. Ermənistanın hazırki hakimiyyəti ilə kilsə arasında ciddi fikir ayrılıqları mövcuddur. Paşinyanın təsiri altında olan erməni KİV-ləri bunu daha çox kilsənın hazırkı rəhbərliyində təmsil olunan şəxslərin əvvəlki hakimiyyətlərlə sıx işləməsini əsas gətirsələr də, əslində məsələnin məğzi tam başqadır.

Ermənilərin yaşadıqları bütün ölkələrdə kilsələr fəaliyyət göstərir və icma üzvləri kilsəyə böyük miqdarda maliyyə yardımı göstərirlər. Bu halda, pul axınının böyük hissəsinə nəzarət etmək istəyən Paşinyana kilsənin “yağlı tikə”ni güzəştə getməməsi də təbiidir. Heç kimə sirr deyil ki, koronavirusun Eçmədzində yayıldığı ərəfədə kilsə rəhbərinin qaçması şəklini mətbuata məhz Paşinyan ötürüb”.