Deputat Xətaidə özbaşınalığın qarşısını aldı - Çevik reaksiya

Xətai rayonu, Gəncə prospekti 2942A məhəlləsinin sakinləri BAXCP sədri, millət vəkili Qüdrət Həsənquliyevdən kömək istəyiblər.

Sakinlər sözügedən ərazidə, “Şəms” şadlıq evinin arxasında, 269 saylı məktəbin girişi önündəki kiçik ərazidə növbəti göydələn tikilməsinə hazırlıq görülməsindən narahatlıqlarını ifadə ediblər.

Sakinlərin sözlərinə görə, ərazidə hazırda 11 hündürmərtəbəli yaşayış binası var və onların əksəriyyətinin həyəti yoxdur. Şəxsi avtomobillərini saxlamaq üçün yer tapa bilməyən və tez-tez mübahisələr yaşanan bu məhəllədə sakinlər maşınlarını artıq Gəncə prospektində park etməyə məcburi olurlar.

İki ay öncə məhəllədə baş verən yanğını xatırladan sakinlər deyib ki, FHN yanğınsöndürənləri yanğın baş verən mənzilin yaxınlığına getmək üçün düz 30 dəqiqə gözləyiblər. Çünki məhəllədə sıx saxlanılan avtomobillər iri qabaritli maşınların hərəkətini tamamilə mümkünsüz edir.

Hələlik məskunlaşma 4 binadadır, digər 7 binada məskunlaşma isə yeni-yeni başlayır. O binalarda da məskunlaşma tamamlandıqdan sonra ərazidəki sıxlığın bir neçə dəfə də artacağını bildirən sakinlər yeni göydələnin tikintisi baş tutarsa, artıq burada yaşamağın mümkünsüz olacağını deyiblər.

Sakinlər artıq bir neçə dövlət qurumuna müraciət edib və heç bir cavab almayıblar. Sözügedən ərazinin deputatı ilə isə əlaqə saxlaya bilmirlər.

“Xətai rayonunun 4 deputatı olmalıdır. 33 və 35 saylı Xətai birinci və üçüncü seçki dairələrinin nəticələri ləğv edilib, 34 saylı Xətai ikinci seçki dairəsinin deputatı isə Mixail Zabelindir. M.Zabelinlə ünsiyyət qurmaq problemimiz var – onunla əlaqə saxlamaq olmur, üstəlik dil baryeri də mövcuddur. Ona görə yeganə ümidimiz 36 saylı Xətai dördüncü seçki dairəsindən millət vəkili seçilən Qüdrət Həsənquliyevədir. Q.Həsənquliyev bizim ərazidən seçilməyib, amma ondan başqasına ümidimiz də yoxdur, çünki Xətainin tək təmsilçisi hazırda Qüdrət Həsənquliyevdir”, - sakinlər qeyd edib.

Sakinlər, həmçinin vurğulayıblar ki, sözügedən ərazidə bina əvəzinə kiçik park salınarsa, bu, insanlara böyük töhfə olar:

“Bu yaxın ərazilərdə park yoxdur, istirahət üçün Ukrayna dairəsindəki yeganə və kiçik parka getməyə məcburuq. Hamı ora getdiyi üçün o kiçik parkda da böyük sıxlıq yaşanır. Halbuki məhəllədə kiçik parkımız olarsa, biz də övladlarımızın gəzməsi üçün şəhərə axışmarıq”.

Sakinlərin sosial şəbəkədə Qüdrət Həsənquliyevə çağırışına millət vəkili dərhal reaksiya verib.

BAXCP sədrinin müavini, tanınmış politoloq Elçin Mirzəbəyli sosial şəbəkə üzərindən paylaşımların dərhal ardından sakinlərlə əlaqə yaradaraq, artıq millət vəkilinin problemlə bağlı Xətai rayon icra başçısı ilə danışdığını qeyd edib:

“İcra Hakimiyyətindən bildirdilər ki, ərazi sahibkara 2015-ci ildə rəsmi sənədlə verilib. Amma tikintinin aparılması bir müddət öncə dayandırılıb. Xətai rayon İH-də baş verən dəyişiklikdən sonra yeni rəhbərlik ərazinin yaşayış binasının tikintisi üçün yararlı olmadığını, buna görə də Dövlət Şəhərsalma və Arxitektura Komitəsinə təkrar müraciət edildiyini bildirib. Komitənin cavabından sonra sözügedən ərazidə abadlıq aparılması və kiçik park yaradılması nəzərdə tutulur”.

E.Mirzəbəyli bildirib ki, millət vəkili prosesi tam nəzarətdə saxlayacağını və Dövlət Şəhərsalma və Arxitektura Komitəsinə rəsmi müraciət edəcəyini deyib:

“Qüdrət bəyin seçildiyi dairə olmamasına baxmayaraq, biz sözügedən ərazini yaxşı tanıyırıq və oradakı problemlərdən məlumatımız var. Ona görə də sakinlər millət vəkili Qüdrət Həsənquliyevin bu problemi ciddi nəzarətdə saxlayacağına əmin ola bilərlər”.