“Ermənilər qırmızı xətti keçdilər..." - Deputat

Faşist Ermənistan işğalçı mövqeyindən əl çəkmir. XX əsrin Xatın, Lidiçe, Babi Yar kimi dəhşətli faciələri ilə bir sırada dayanan Xocalı soyqırımı ermənilər üçün yetərli olmadı. “Dənizdən dənizə” sarsaq xülyaları naminə insanlığa qarşı ən ağır cinayətlər törətdilər. Dinc əhalinin kütləvi qırğınından usanmayan barbar ermənilər yeni qətliamlara qərar veriblər.

Bu fikirləri Teleqraf.com-a açıqlamsında Milli Məclisin deputatı Pərvin Kərimzadə deyib.

Millət vəkili bildirib ki, işğalçı Ermənistanın silahlı qüvvələri beynəlxalq hüququn norma və prinsiplərini kobudcasına pozub:

"1949-cu il tarixli Cenevrə konvensiyaları və onların əlavə protokolları da işğalçı Ermənistan tərəfindən əhəmiyyətsiz hesab edilir. Ermənistan elan edilmiş humanitar atəşkəs rejiminin tələblərini də pozaraq, dinc sakinlərimizi bilərəkdən hədəfə almaqda davam edir. Humanitar atəşkəs elan edilməsinə baxmayaraq, erməni tərəfi öz riyakar xislətinə və təcavüzkar mahiyyətinə uyğun olaraq cəbhəboyu və cəbhədən uzaq şəhərlərimizi ağır artilleriya atəşinə tutur”.

Deputat qeyd edib ki, Azərbaycanın ikinci ən böyük şəhəri, cəbhə xəttindən uzaqda yerləşən Gəncə ermənilərin artilleriya atəşinə məruz qaldı:

“İşğalçı Ermənistanın siyasi-hərbi rəhbərliyinin əmri ilə atılan qadağan olunmuş raket 3 yaşayış binasını dağıtdı. Bu terror aktı, barbar və vəhşi hücumu nəticəsində 5-i qadın olmaqla 10 nəfər həlak oldu. 16-ı qadın, 6-sı azyaşlı olmaqla 40 nəfər yaralandı. Bu, düşmənin uzaqmənzilli raketlə Gəncədə əhalinin sıx yaşadığı ərazini vurmasının xain planlarının bir hissəsi idi. Çünki Ermənistanın humanitar atəşkəsin prinsiplərinə riayət etmədiyini hər addımda təsdiq edir. Humanitar atəşkəsin elan olunmasından 14 saat sonra Gəncə və Mingəçevir şəhərlərinin yenidən işğalçı dövlət tərəfindən raket hücumuna məruz qalması artıq qırmızı xətti keçməkdir. Raket hücumları Ermənistanın Gorus, Sisian, Vardenis, Cermuk və Berd şəhərlərindən həyata keçirilib. Bu isə birbaşa regionda sülh və sabitliyə ciddi təhlükədir”.

Pərvin Kərimzadə əlavə edib ki, düşmənin mülki əhali və infrastrukturu məqsədyönlü şəkildə hədəfə almasında məqsədi dinc sakinləri təşvişə salmaqdır:

"Avantürist erməni hakimiyyəti məqsədinə çata bilmədi. Azərbaycan xalqında, həmçinin Gəncə sakinlərində heç bir təşviş yarada bilmədilər. Bütün gəncəlilər düşmən terrorundan, təxribatından çəkinmədən öz işinə-gücünə davam edir. Şanlı ordumuz haqq mübarizəsində qalib olacaq. Günahsız uşaqları hədəf alan, evləri dağıdan işğalçı Ermənistan layiq olduğu cavabı alacaq. Ali Baş Komandan İlham Əliyevin rəhbərliyi ilə ordumuz torpaqlarımızı işğaldan azad edəcək. Erməni təcavüzünə son qoyulacaq”.