“Rusiya savaşa müdaxilə etməsəydi, indi bölgədə...” – Politoloq

“Suriyada hökumət əleyhinə ilk etiraz aksiyaları 2011-ci il martın 15-də başlayıb, bu gün həmin hadisələrin start götürməsindən on il ötür. “Ərəb baharı” Suriyaya çatdıqda çoxları düşünürdü ki, Tunis, Liviya və Misirdə olduğu kimi Suriyadakı Əsəd rejimi də xalq etirazları qarşısında çökəcək. Suriyalıların bir hissəsi dəyişiklik tələb edirdi. Əsəd rejiminə müxalif olanlar şəhər və qəsəbələrdə etirazlara başladıqda ordu onlara atəş açdı və ilk qurbanlar qeydə alındı. Bundan sonra Suriyada müxalif qruplar silahlanmağa başladı, o cümlədən ordudan kiçik qopmalar baş verdi. Ancaq gedişat fərqli istiqamətə yönəldi”.

Teleqraf.com xəbər verir ki, bunu politoloq Elxan Şahinoğlu söyləyib.

Onun sözlərinə görə, Suriyadakı vətəndaş müharibəsindən ilk növbədə müxtəlif terrorçu qruplar faydalanmağa başlayıb:

“Əl-Qaidə” və yeni yaranan İŞİD terrorçu təşkilatı tərəfdar toplayaraq həm Suriya, həm də İraqda şəhər və qəsəbələri ələ keçirdi. Müxtəlif ölkələrdən İŞİD-ə qoşulanların sayı artdı. Azərbaycandan Suriyaya yollanıb İŞİD-ə qoşulanların sayı min nəfərə çatmışdı, bəziləri ailələriylə terrorçulara qoşulurdu. Sonrakı illərdə İŞİD-ə qarşı aparılan uğurlu mübarizə bu terrorçu təşkilatın cazibəsini azaltdı və bu təşkilata qoşulmaq istəyənlərin sayı azaldı. Bu İŞİD-ə qoşulan azərbaycanlılara da aiddir. İŞİD-ə qoşulan azərbaycanlıların bir hissəsi Suriyadakı döyüşlərdə öldü, geri qayıdanlar isə həbs olundular. Azərbaycana gizli keçənlər isə sonrakı mərhələlərdə nəzarət altına alındılar.

İkincisi, ABŞ, Türkiyə və bir sıra ərəb ölkəsinin hədəfi eyni idi: Əsəd hakimiyyətdən uzaqlaşdırmaq lazımdır. Ancaq zaman keçdikcə maraqlar kəsişməyə başladı. ABŞ Suriyadakı radikal kürdləri silahlandırmağa başladı ki, bu, Türkiyənin maraqlarına ziddi idi. Ərəb ölkələri Suriyadakı radikallara silah ötürürdü. Türkiyə isə öz növbəsində Suriyada silahlı müxallifətə dəstək verirdi. Ancaq Türkiyənin silahlandırdığı və təlim keçdiyi Suriya Azadlıq Ordusu radikal cərəyanlardan və PKK-nın törəmə təşkilatları olan PYD və YPG-dən zəif olduğundan Ankara Suriya tərəfdən sərhədi nəzarətə götürməyə qərar verdi. Bu məqsədlə Türkiyə ordusu Suriya ərazisində bir neçə əməliyyat həyata keçirdi”.

Elxan Şahinoğlu qeyd edib ki, Rusiya Əsədi qorumaq məsqsədilə ordunu Suriyada yerləşdirərək itiirlən ərazilərin bir neçəsini geri qaytardı, “Əl-Qaidə” və İŞİD-ə öldürücü hava zərbələr vurdu:

“Rusiyanın hərbi müdaxiləsi olmasaydı, Əsəd hakimiyyətini qoruya bilməyəcəkdi.

Əsəd öz hakimiyyətini qorudu, ancaq ölkəsinin bütövlüyünü qoruya bilmədi. Suriya hazırda parçalanmış vəziyyətdədir, 10 il ərzində yüz minlərlə insan öldü, iqtisadiyyat dağıdlı və yenidən bərpası üçün müxtəlif hesablamalara görə 250 milyard dollar lazımdır.

Suriyada Əsəd rejimi ilə yanaşı ABŞ-ın, Türkiyənin, Rusiyanın, İranın hərbi qüvvələri mövcuddur, hətta İsrail təyyarələri də zaman-zaman Suriyada Hizbullah təşkilatının mövqelərinə zərbələr endirirlər. Yəni, ölkənin bütövlüyündən danışmaq mümkün deyil.

Digər tərəfdən Suriya əhalisinin yarısına qədəri köçkündür, milyonlarla suriyalı Türkiyə, İordaniya, Livan və Avropa ölkələrinə axışıb və bu proses bu gün də davam edir. Rusiya, Türkiyə və İranın iştirakı ilə Astana prosesi çərçivəsində Suriyada siyasi dialoq ləng gedir, gələcək konstitusiya ilə bağlı yekdil fikir yoxdur”.