Proses Azərbaycanın lehinə dəyişir: “Ruslar bunu unutmamalıdır”

“Ötən il 14 iyul yürüş-mitinqi göstərdi ki, Azərbaycanla bağlı siyasət Vaşinqton, Moskva, Paris, İrəvanda yox, məhz Bakıda müəyyən edilir. Azərbaycan xalqı tarixi, mədəniyyəti, irsi ilə sübut edib ki, dünya xalqları arasında öz yerini tutmağa və qorumağa layiqdir. Bu, ya güclə, ya da xoşluqla olacaq”.

Teleqraf.com xəbər verir ki, bu sözləri siyasi ekspert Zaur İbrahimli deyib.

Ekspertin fikrincə, beynəlxalq güclər və təşkilatların ölkəmizə, Qarabağ məsələsinə yanaşmasını müəyyən edən əsas amil – cəmiyyətin, sadə insanların gerçək münasibətidir, müharibə istəyinin nə dərəcədə güclü, yaxud zəif olmasıdır, səfərbər olmaq potensialıdır:

“Ötən il bütün nüansları nəzərə almaqla deyə bilərik ki, bunun spontan, planlaşdırılmamış şəkildə olması xalqın səmimi istəyindən xəbər verdi. Azərbaycan hökuməti də çox güclü kart-blanş əldə etdi. Dövlət başçısı doğru yolu göstərdi. 14 iyuldan başlayan yol 8-10 noyabrda Şuşada qələbə ilə başa çatdı. Qəti əminliklə deyə bilərik ki, öz torpaqlarını, suverenliyini, 10 noyabr üçtərəfli sazişin nəticələrini qorumaqda Azərbaycan xalqı, dövləti, ordusu, onun Ali Baş Komandanı ötənildəkindən daha qətiyyətlidir. Ötən il 14 iyul yürüş-mitinqi göstərdi ki, Azərbaycanla bağlı siyasət daha Vaşinqton, Moskva, Paris, İrəvanda yox, məhz Bakıda müəyyən edilir. Bu proseslərdə son söz, son qərar Azərbaycan xalqına məxsusdur.

Düşünürəm ki, tez-tez Moskvaya və digər paytaxtlara 1988-1990-cı illərdə Milli Azadlıq Hərakatını xatırlatmaq, Azərbaycan xalqının Azadlıq meydanında dünyanı heyrətləndirməsini və SSRİ-nin büdrəməsini yada salmaq lazımdır. Həmçinin, ruslar gərək 1990-cı il 20 Yanvar qəhrəmanlıq salnaməsini də unutmasınlar, o zaman Azərbaycan övladları tankların qabağına əliyalın çıxdılar. 20 yanvar hadisələri indi Kremldə həsrətini çəkdikləri SSRİ-ni sarsıtdı və sonrakı proseslərə təkan verdi. Məhz 20 yanvar hadisələri Qərb analitikləri və liderlərinin SSRİ-i bağlı sonrakı planlarını müəyyən etdi. Düşünürəm ki, biz indiki məqamda Birinci Qarbağ müharibəsi dövründə Azərbaycan Ordusunun iyun-iyul əməliyyatlarını, Horadiz əməliyyatını xatırlatmaq yerinə düşər. Bununla yanaşı, 1920-ci il Qarabağda erməni qiyamının yatırılması ilə nəticələnən Azərbaycan Xalq Cümhuriyyətinin Əsgəran əməliyyatını da yada salmaqda fayda var. Ən başlıcası gərək 15 sentyabar 1918-ci ildə Bakının azad olunmasını da tez-tez xatırladaq, Şuşanın, Hadrutun azad edilməsini də nümunə çəkək”.

Zaur İbrahimli qeyd edib ki, 1990-cı illərdən fərqli olaraq hazırda Azərbaycanın, güclü, dost-qardaş Türkiyə ilə çiyin-çiyinə durub və ermənilər daha özgə ölkələrin muzdlularına, ən başlıcası vertalyot və qırıcılarına ümid etməsinlər:

“Vaşinqton və Parisdə də bir daha tarixə nəzər salmalı və 1920-22-ci illər proseslərini ciddi təhlil etməlidirlər. SSRİ-nin yaranması məhz Cənubi Qafqazın bolşeviklər tərəfindən işğalı ilə mümükün oldu, bolşeviklər Bakı neftinə nəzarəti ələ keçirərək, İranla sərhədə çıxaraq böyük güc əldə etdilər. Həmçinin, Orta Asiyanı da təcrid edə bildilər. Tarix yalnız keçmiş deyil və hər bir xalqın potensialını göstərir. Azərbaycan xalqı öz tarixi, mədəniyyəti, irsi ilə sübut edib ki, dünya xalqları arasında öz layiqli yerini tutmağa və qorumağa layiqdir. Bu ya güclə, ya da xoşluqla olacaq”.