Zəngəzurdan İstanbula qədər uzanan dəhliz: bu, yeni dönəmin reallığıdır – Şərh

Türkiyə Prezidenti Rəcəb Tayyib Ərdoğan ikinci dəfə Qarabağa səfər etdi. Qardaş ölkə rəhbərinin Füzulidə olması, yeni hava limanının açılışında iştirak etməsi, eləcə də Zəngilana - "Ağıllı kənd"ə səfəri Azərbaycan-Türkiyə qardaşlığının növbəti nümunəsi olmaqla yanaşı, həm də bütövlükdə Cənubi Qafqaz regionu üçün mühüm tarixi hadisədir.

Bunu Teleqraf.com-a Milli Məclisin deputatı Könül Nurullayeva deyib.

O qeyd edib ki, Azərbaycan və Türkiyə liderlərinin Füzuli Beynəlxalq Hava Limanının, yəni Qarabağın hava qapısının açılışında iştirakı mühüm tarixi hadisə idi: “Cəmi 8 aya inşa olunan bu beynəlxalq statuslu hava limanı da daxil olmaqla Azərbaycanın Qarabağda həyata keçirdiyi bərpa-quruculuq işləri çox yüksək qiymətləndirilir. Türkiyə Prezidenti Rəcəb Tayyib Ərdoğanın da söylədiyi kimi, “azad edilən ərazilərin qısa müddətdə sürətlə inkişaf etdirilməsi hər siyasətçinin işi deyil”. Azərbaycan bütün dünyaya örnək olacaq bir model ilə bu bölgəni inkişaf etdirmək üçün fəaliyyətini davam etdirir. Liderlərin birgə bəyanatında da qeyd olunduğu kimi, davamlı sülhün təmin olunması və arzu edilən normallaşma istiqamətində irəliləyiş üçün bu gün əlverişli şərait yaranıb”.

Millət vəkili hesab edir ki, bunun üçün bölgədəki yeni duruma uyğun hərəkət edilməlidir: “Qarabağdan verilən əsas mesaj ondan ibarət idi ki, Ankara da, Bakı da bölgədə davamlı sülhün və hərtərəfli normallaşmanın tərəfdarıdır. Bu coğrafiyadan keçəcək quru və dəmir yolu xətləri təkcə Azərbaycan və Türkiyə üçün deyil, bütün bölgə ölkələri üçün iqtisadi fürsətlər yaradacaq. Zəngəzurdan çıxıb, İstanbula qədər gedə biləcəyimiz bir dəhlizin təməlini qoyan Azərbaycan və Türkiyə bu bölgənin əsas söz sahibi olduqlarını bir daha bəyan etmiş oldular. Post-münaqişə dövründə Azərbaycanın həyata keçirdiyi bərpa-quruculuq işləri bundan sonra da davam edəcək. Türkiyə də qardaş ölkə kimi bu prosesdə Azərbaycanın yanındadır”.

Könül Nurullayevaya görə, Azərbaycan 44 günlük savaşda qalib gəlməklə bölgənin əsl potensialının həyata keçirilməsinə mane olan səbəbi aradan qaldırıb: “Bu gün Qarabağda təməli qoyulan layihələr, tunellər, avtomobil yolları bölgədə görülən işlərin miqyasını göstərir. Zəngilan rayonunda təməli qoyulan birinci özəl sərmayə layihəsi də Türkiyə və Azərbaycanın birgə projesidir. Bütün işlərdə, o cümlədən işğaldan azad edilmiş torpaqlarda gedən quruculuq, bərpa işlərində də Bakı və Ankara bir yerdə irəliləyir”.