İrəvana göndərilən 5 maddəlik sülh paketi – Dosyedə nələr var?

“Ermənistanın Qarabağ da daxil olmaqla, Azərbaycanın ərazi bütövlüyünü tanıması Bakıdan İrəvana təqdim olunan sülh paketində yer ala bilər”.

Teleqraf.com xəbər verir ki, bunu politoloq Zaur Məmmədov deyib.

Ekspert Ermənistan-Azərbaycan münasibətlərinə dair son gəlişmələrə diqqət çəkib: “Azərbaycan Ermənistana 5 maddəlik sülh paketini təqdim edib. Ola bilər ki, Bakıdan İrəvana verilmiş paketə aşağıdakı təkliflər daxildir:

- Ermənistan Azərbaycanla sərhədlərin demarkasiya və delimitasiyasına 1970-ci illərin xəritələri əsasında getməlidir;

- Ermənistan Qarabağ da daxil olmaqla Azərbaycanın ərazi bütövlüyünü tanımalıdır;

- Bölgədəki nəqliyyat xətlərinin açılması və Qərbi Zəngəzur dəhlizinə xüsusi statusun verilməsi;

- Qərbi azərbaycanlıların Ermənistana – öz tarixi yurdlarına qayıdışı üçün danışıqların başlanılması və maddi təzminatın ödənməsi;

- Ermənistan işğal altındakı anklavları tərk etməlidir”.

Azərbaycandan Ermənistana məlum təkliflərin verilməsi ilə bağlı açıqlamanı Xarici işlər naziri Ceyhun Bayramov verib. Nazir açıqlamasında bildirib ki, Azərbaycan Ermənistana münasibətlərin normallaşması ilə bağlı 5 maddədən ibarət təklif göndərib və hazırda cavab gözləyir.