“Türkiyə Azərbaycanda hərbi baza qura bilər” – Ekspert tarix verdi

“Gələn il Azərbaycanda Türkiyə hərbi bazası yaradıla bilər”.

Teleqraf.com xəbər verir ki, bunu politoloq Məhəmməd Əsədullazadə deyib.

Ekspertin fikrincə, Rusiya nümayəndəsinin BMT-də Azərbaycanı öz ərazilərində bir sıra xarici ölkələrin bioloji silah laboratoriyalarının fəaliyyətinə yer verməkdə ittiham etməsi Kremlin yeni təzyiq mexanizmdir:

“Təsadüfi deyil ki, Rusiya Ukraynaya da bu kimi ittihamlarla müdaxilə edib. Rusiya Ukrayna ilə yanaşı, bir sıra digər keçmiş sovet respublikalarını da “bu fakt” qarşısında qoymağa çalışır. Yəni Rusiya Ukraynada öz hərbi məqsədlərinə nail olsaydı, bu kimi ittihamlarla digər qonşularına da hücuma keçəcəkdi.

Rusiya Azərbaycanın Cənubi Qafqazda yaratdığı geosiyasi nizamı qəbul etmək istəmir. Bu geosiyasi nizam isə bölgə ölkələri arasında siyasi-iqtisadi əməkdaşlıq, sülhün və təhlükəsizliyin təmini, həmçinin Ermənistanla sülh müqavisləsinin bağlanmasıını özündə ehtiva edir.

Brüsselin vasitəçiliyi ilə Azərbaycan və Ermənistan arasında birbaşa təmasın qurulması və normallaşma prosesinə start verilməsi Moskvanı hərəkətə keçirdi. İlk anlaşma siqnalı verilən kimi Moskva Azərbaycana qarşı hədə dilinə keçdi, Ermənistanda isə müxalifətin əliylə Paşinyana qarşı etirazların başlamasına rəvac verdi. Bəllidir ki, Rusiya Azərbaycanla Ermənistan arasında sülh müqaviləsini bağlamasına sükutla yanaşmayacaq. Bu baxımdan, Qarabağda ciddi təxribatların törədilməsi gözləniləndir”.

Məhəmməd Əsədullazadə bildirib ki, Brüsseldə əldə edilmiş razlaşamaya əsasən, aprelin sonunda sərhədlərin delimitasiya və demarkasiyası üzrə ikitərəfli komissiya yaradılmalıydı:

“Məhz Rusiyanın müdaxiləsindən sonra bu komissiya yaradılmadı.

Hesab edirəm ki, Rusiyanın Azəbaycana qarşı təzyiqləri müsbət nəticə verməyəcək. Prezident İlham Əliyevin Türkiyə ilə sıx siyasi-hərbi əməkdaşlığı dərinləşdirməsi siyasəti Moskvanın təzyiqləri qarşısında mövqeyimizi və duruşumuzu gücləndirir. Mayın 14-də İlham Əliyev Türkiyəyə gedəcək, bir neçə gün sonra isə Rəcəb Tayyib Ərdoğan ölkəmizə gələcək. Bu qarşılıqlı səfərlərin də hərbi müttəfiqlik münasibətlərinə əlavə çalar qazandıracağını düşünürəm.

Bir sözlə, Rusiyanın Ukraynaya qarşı işğalçı yürüşü qonşu ölkələrin təhlükəsizliyi məsələsini ön plana çıxarıb. Qənaətimə görə, Azərbaycanda öz hərbi doktirinasında dəyişikliyə gedərək, Türkiyənin ölkəmizdə hərbi baza qurmasına yer verməlidir. Bu istqamətdə işlərin getdiyi istisna deyil və növbəti ildə türk hərbi bazası Azərbaycanda yerləşdirilə bilər. Hərbi müttəfiqlik haqda Şuşa bəyannaməsi də buna ideal zəmin yaradır, bizə əngəl olan heç nə yoxdur”.