Fransa senatının qərarı Makronun ambissiyalarına xidmət edir - Açıqlama

Fransa senatında Azərbaycana qarşı qəbul olunmuş qətnamə tamamilə qərəzli və qeyri-obyektivdir. Bu sənədin qəbul olunması Fransa rəhbərliyinin, o cümlədən parlament üzvlərinin maraqlarından irəli gəlir.

Bunu Teleqraf.com-a Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.

O qeyd edib ki, Fransada erməni diasporu və lobbisi çox fəaldır, siyasiləşib: “Buna görə də, Fransa parlamentariləri bu ölkədə yaşayan ermənilərin səsini qazanmaq üçün belə bir qətnamə qəbul edib. Yəni bu, daxili auditoriyaya hesablanmış bir qərardır. Fransa siyasi elitasında şəxsi maraqlarını güdən insanlar unudurlar ki, ölkələrinin milli və qlobal maraqları da var və bu maraqlara xidmət etmək lazımdır. Lakin Senatda qəbul olunmuş qətnamə Azərbaycan-Fransa münasibətlərinə xələl gətirir”.

Sevinc Fətəliyeva hesab edir ki, Fransa rəhbərliyinin son vaxtlar artan ritorikası dövlət maraqlarına zərbə vurur:

“ATƏT-in Minsk qrupunun həmsədri olmuş bu ölkənin təcavüzkar Ermənistanı dost və müttəfiq hesab etməsi, Ermənistana dəstək göstərməsi ilk növbədə Fransanın özünə zərbədir. Biz bilirik ki, həmsədr ölkə kimi Fransa heç vaxt ədalətli mövqe tutmayıb. Bütün dünya şahiddir ki, Ermənistan 30 il işğal altında saxladığı Azərbaycan torpaqlarında hansı vandalizm törədib. Amma Fransa bir dəfə də olsun Ermənistanı işğalçı siyasətə son qoymağa çağırmadı, BMT Təhlükəsizlik Şurasının müvafiq qətnamələrinin yerinə yetirilməsini tələb etmədi. Əksinə, Azərbaycan 44 günlük Vətən müharibəsində torpaqlarını işğaldan azad etməklə Təhlükəsizlik Şurasının qətnamələrini icra edərkən Fransa açıq-aşkar şəkildə Ermənistana dəstək verdi. Demək olar ki, bu dövrdə Fransa gerçək simasını nümayiş etdirdi. İndiki şəraitdə də Fransanın bu mövqeyi, Senatın qəbul etdiyi qətnamə Azərbaycanla Ermənistan arasında normallaşma prosesinə ziyan vurur. Eyni zamanda, beynəlxalq hüquqa hörmətsizliyin nümayişi olan bu sənədi qəbul etməklə Fransa normallaşma prosesində vasitəçi ola bilməz”.

Deputat bildirib ki, bütün bunların fonunda Fransa prezidenti Emmanuel Makron özünü sülh tərəfdarı kimi göstərməyə çalışır: “Ukrayna və Rusiya arasında Fransa vasitəçilik təklif edir. Amma Azərbaycanla Ermənistanın münasibətlərinin normallaşması prosesinə əngəl yaradan mövqe ortaya qoyur. Yəqin ki, onun şəxsi ambissiyaları çoxdur. Ona görə də belə populist addımlara, oyunlara əl atır”.

Millət vəkili həmçinin Azərbaycanın Birinci vitse-prezidenti Mehriban xanım Əliyevanın UNESCO-nun xoşməramlı səfiri kimi fəaliyyətinə xitam verməsinə də münasibət bildirib: “Mehriban xanım Əliyevanın bu qərarı çox düzgün və mükəmməl diplomatik addımdır. Mehriban xanım UNESCO-nun baş direktoruna məktubunda təşkilatın ideyalarına və dəyərlərinə sadiq olduğunu bildirir. Onun xoşməramlı səfir fəaliyyətinə xitam verməsi təşkilata qarşı addım deyil. Məlumdur ki, UNESCO-nun Katibliyinə Fransa nümayəndəsi rəhbərlik edir. Fransanın nümayəndəsi bu vəzifəyə seçildikdən sonra Fransa Xarici İşlər Nazirliyində öz komandasını UNESCO-ya cəlb edib. UNESCO-da 193 üzv ölkə təmsil olunur. Azərbaycanın bu ölkələrlə sıx əməkdaşlığı var. Amma Fransa bu təşkilatı öz təsiri altına salmağa çalışır. UNESCO Azərbaycanın təşəbbüslərini hər zaman dəstəkləyib. Təşkilatda ölkəmizi dəstəkləyənlər çoxdur. Qoşulmama Hərəkatının sədri kimi də Azərbaycan UNESCO-da kifayət qədər nüfuz qazanıb. Amma bu gün təşkilatın Fransanın təsiri altında olması qəbuledilməzdir. Azərbaycan işğaldan azad olunmuş ərazilərimizə UNESCO-nun missiya göndərilməsi üçün dəfələrlə müraciət edib. Amma təşkilatın Fransa nümayəndələrindən ibarət olan katibliyi tərəfindən bu missiyanın göndərilməsinin qarşısı alınır. Düşünürəm ki, indiyə qədər UNESCO-da Mehriban xanım Əliyeva qədər fəal xoşməramlı səfir olmayıb. Mehriban xanım bu sahədə çox uğurlu fəaliyyət göstərib. Düşünürəm ki, burada itirən UNESCO-dur. Eyni zamanda, təşkilatın baş katibi vəzifəsi də uzun ömürlü deyil və prosedura uyğun olaraq bir müddətdən sonra yeni şəxslə əvəzlənəcək. Bu yaxınlarda təşkilatın 58 üzv dövlətdən ibarət ali orqanı olan İcraiyyə Şurasına Azərbaycanın da seçilməsi, Şurada “Bakı prosesi” ilə bağlı sənədin qəbul edilməsi ölkəmizin nüfuzundan xəbər verir”.