Saakaşvilidən şok açıqlama: “Dərhal Azərbaycanla...”

“Regionumuzu xilas etmək üçün dərhal Azərbaycan və Ermənistan arasında sülh müqaviləsi imzalanmalıdır”.

Teleqraf.com xəbər verir ki, bunu Gürcüstanın sabiq prezidenti Mixail Saakaşvili Ermənistan Baş naziri Nikol Paşinyana müraciətində deyib.

“İlk dəfədir sizə müraciət edirəm, bunu açıq edirəm, çünki regionumuzun və Ermənistanın taleyi məni çox narahat edir. Rusiya ilə və bu yaxınlarda MDB sammitində bu təşkilatın dağılmasında məni praktiki olaraq günahlandıran Putinlə ünsiyyət təcrübəmə əsaslanaraq sizə bir neçə məsləhət verim. Siz xalq üsyanı nəticəsində hakimiyyətə gəlmisiniz, Putinin terminologiyası ilə desək, bu, “rəngli inqilab”dır. İnanın ki, onu nə qədər sakitləşdirsəniz, and içsəniz də, o sizi heç vaxt bağışlamaz və bağışlamayacaq. Üstəlik, son bəyanatlarınızdan, siyasi gedişlərinizdən və xüsusən də Roma Statutunu ratifikasiyasından sonra o, sizin qan düşməninizdir, əlində olan bütün imkanlarla – daxili iğtişaşlarla, hərbi əməliyyatların təşviqi ilə sizi devirəcək. O, sizi iqtisadi cəhətdən boğacaq və hibrid müharibənin bütün arsenalından istifadə edəcək.

Çox az vaxtınızın olduğunu xatırlamaq lazımdır. Hakimiyyətə gələndən sonra əsaslı islahatlar apara bilmədiniz, indiki dövlət aparatınız həqiqətən də Kremlin “beşinci kolon”udur. Avropaya inteqrasiyada gecikmisiniz”, - sabiq prezident bildirib.

Saakaşvili qeyd edib ki, Paşinyan üçün nə qədər çətin olsa da, Ermənistan ətrafında baş verən son hadisələr regionumuza yeni şans verir:

“Müəyyən müddətdən sonra biz üç Baltikyanı ölkə kimi yaşaya bilərik - açıq sərhədlərlə, üçünün hər birinin üstünlüklərindən istifadə edərək bütöv bir logistika, maliyyə, enerji qovşaqları sistemi yarada bilərik. Ancaq bunun üçün tələsməli və hər hansı bir tərəddüd etməməlisən, hər şeyə gedin. Rusiya hərbi bazasının dərhal çıxarılmasını tələb edin, MDB, KTMT, Gömrük İttifaqından çıxın, Avropa İttifaqı və NATO-ya müraciət edin.

2013-cü ildə Avropa Komissiyasının sədri Barrozu ilə birlikdə İrəvana uçduq və boş yerə sələfinizi (Serj Sərkisyan) Moskvanın himayəsində olan bu təşkilatların bəzilərinə qoşulmamağa inandırmağa çalışdıq. Nəhayət, siz açıq şəkildə bəyan etməli və dərhal Azərbaycanla sülh müqaviləsi imzalamalı və bununla da Ermənistanın daxili və xarici siyasətində əsaslı dəyişikliklərə yol açmalısınız.

Ümid edirəm ki, sizdə şəxsi və siyasi cəsarət əskik olmayacaq, Putinə sizi və eyni zamanda ölkənizi məhv etməyə və regionumuzu tamamilə sarsıtmağa imkan verməyəcəksiniz. Hamımızın üzləşdiyi təhlükə çox realdır və dərhal hərəkətə keçməyi tələb edir. Ümid edirəm bu dəfə tərəddüd etməyəcəksiniz”.