Teleqraf.com saytının redaktoru birinci oldu

Bu gün Saatlı rayonunda Azərbaycan Mətbuat Şurası Saatlı Rayon İcra Hakimiyyəti ilə birlikdə “Muğanımız - tariximiz, sərvətimiz” mövzusunda kütləvi informasiya vasitələrinin təmsilçiləri arasında keçirilən yazı müsabiqəsinin nəticələri açıqlanıb.

Mərasimdən öncə tədbir iştirakçıları Kənd Təsərrüfatı naziri Heydər Əsədovun iştirakı ilə Saatlı rayon Kənd Təsərrüfatı İdarəsinin inzibatı binasının açılış mərasimində iştirak ediblər. İştirakçılar Sarıcalar kəndində pambıq və buğda zəmiləri ilə tanış olublar.

Daha sonra rayonun Heydər Əliyev mərkəzində Milli Qurtuluş Günü ilə bağlı konfrans keçirilib. Saatlı rayonun icra hakimiyyətinin başçısı Siraqəddin Cabbarov Milli Qurtuluş Günü ilə bağlı çıxış edib.

Mərasimin sonunda yazı müsabiqəsinin mükafatlandırılma mərasimi keçirilib. Azərbaycan Mətbuat Şurasının sədri Əflatun Amaşov bildirib ki, müsabiqəyə 2016-cı ilin aprel ayının 15-dən may ayının 30-dək müddətdə 35 yazı verilib. Yekunda 1 nəfər 1-ci yer, 2 nəfər 2-ci yer, 3 nəfər 3-cü yer və 11 nəfər həvəsləndirici mükafatlara layiq görülüblər.

Qeyd edək ki, müsabiqədə birinci yerin qalibi Teleqraf.com saytının redaktoru Qurban Yaquboğlu olub.

Teleqraf.com saytının əməkdaşı Səxavət Həmid həvəsləndirici mükafata layiq görülüb.

İlhamə ƏBÜLFƏT